Skip to content
د افغانستان سینما یو شمېر لوبغاړي وایي،له سیاسي بدلون سره یې هر څه له لاسه ورکړل، فعالیت یې بې برخلیکه شوی او نه پوهېږي،چې څه وکړي.
د سینما دغه لوبغاړي له نړیوالو غواړي،چې د هنر ژوندي ساتلو لپاره یې لاسنیوی وکړي او دوی یوازې پرېنږدي.
د سینما لوبغاړی نقیب الله شجاعي وايي:« موږ هنرمندان، فلم جوړونکي او سینماګران د یو شمېر هېوادونو له ملاتړ مننه کوو چې په تیرو کلونو کې یې موږ ته زمینه برابره کړې وه چې پرمختګ وکړو، خو صمیمانه ترې یو ځل بیا غوښتنه کوو چې موږ دې یوازې نه پرېږدي او پاملرنه دې وکړي چې موږ څنګه وکولی شو خپلو فعالیتونو ته دوام ورکړو.»
د سینما لوبغاړی صدام وايي:« موږ په ښه وضعیت کې نه یوو،ځکه چې زموږ مسلک فلم او سینما دی،چې د خپل هېواد وضعیت منعکس کړو،خو د اوس لپاره دا چارې محال دي.»
افغان سینما چې له پخوا په کمزوري ځان چلېده، اوس یې چارې پر ټپه ولاړې دي،خو لوبغاړي وایي،غلي نه کېني او خپل غږ تر نړیوالو رسوي.
ښځینه افغان سینما ګرې هم شکایت کوي،چې دې برخه کې یې کلونه زده کړي کړي او اوس یې فعالیت بیخي ممنوع دی.
د سینما لوبغاړې بهار همدرد وايي:« زه د څلورم کال محصله یم،ماته اجازه نه راکول کېږي چې نور دې برخه کې زده کړې وکړم، نو موږ له اسلامي امارت غواړو،چې دې برخه کې جدي پاملرنه وکړي.»
اسلامي امارت بیا تازه د افغان فلم مشر ګومارلی،چې څنګه کولی شي،د فلم نړۍ روانه وساتي او د افغانستان وضعیت، دود او دستور او دغه راز نورې پېښې منعکسې کړي.
