په داسې حال کې چې د اسلامي امارت امنیتي ځواکونه ډېورنډ فرضې کرښې ته څېرمه د امنيتي پوستو پرجوړولو بوخت وو، پاکستاني ځواکونو يې په غبرګون کې پرې ډزې کړې او ورپسې د جګړې له امله، پاکستاني لوري د تورخم دروازه د هر ډول تګ راتګ پر مخ وتړله.
له شاوخوا درېيو اوونيو راهيسې پاکستان د تورخم لاره تړلې ساتلې او په دې لړ کې څو ځله د افغان او پاکستاني ځواکونو ترمنځ وقفه يي نښتې هم شوې دي.
د افغان سولې لپاره د امریکا پخواني ځانګړي استازي زلمي خلیلزاد د تورخم لارې تړل کېدو په غبرګون کې ویلي، اسلام اباد غواړي د افغانستان سرپرست حکومت د امنيتي پوستو له جوړولو منع کړي، خو په خبره يې برعکس د ډېورنډ فرضي کرښې پورې غاړې ته يې د تاسيساتو په جوړولو سره کلک تدابېر نيولي.
خلیلزاد زیاته کړې:« پاکستان هڅه کوي په زور افغانستان د نوې امنیتي پوستې له جوړولو او د یوې موجوده پوستې له رغولو او قوي کولو منع کړي. پاکستان خپلې خوا ته امنیتي پوستې جوړې کړې دي؛ نو ولې افغانان باید خپل لوري ته امنیتي پوستې ونه لري؟»
له دې سره هم مهاله، د ریاست الوزرا اداري مرستیال په اسلام اباد کې د افغانستان له شارژدافیر سره په کابل کې کتلي او پرته له دې چې د ستونزو د حل لارې چارې روښانه کړي، ويلي يې دي چې افغانستان او پاکستان د ګاونډیانو په توګه کولی شي خپلې اړیکې پیاوړې کړي.
د اسلامي امارت مرستیال ویاند حمدالله فطرت وايي: « په اسلام اباد کې د افغانستان سفیر همدارنګه وویل، د افغانستان اسلامي امارت د رهبرۍ له لارښوونو سره سم هڅه کوي چې د دواړو هېوادونو ترمنځ اړیکې ښه والی پیدا کړي. د رياست الوزرا اداري مرستيال محترم مولوي عبدالسلام حنفي په پاکستان کې د اسلامي امارت سفیر ته د ښه راغلاست ترڅنګ څرګنده کړه، افغانستان او پاکستان د دوو مسلمانو، وروڼو او ګاونډیو هېوادونو په توګه د زیاتو فرهنګي، تاریخي، دیني او ټولنیزو مشترکاتو لرونکي دي او د دواړو لوریو مسوولین کولی شي له دغو ظرفیتونو په اقتصادي، سیاسي او فرهنګي برخو کې د اړیکو د پیاوړتیا او پراختیا لپاره ګټه واخلي.»
له بلې خوا، د پوځي چارو شنونکي بيا پاکستان تورنوي چې ګواکي له یوې خوا کابل سره د ښو اړيکو پر لرلو ټينګار کوي، خو له بلې خوا د تورخم لاره وخت ناوخت د فشار د وسیلې په توګه کاروي.
دوی له دواړو خواوو غواړي چې خپلې ستونزې په خبرو حل کړي نه په تاوتريخوالي.
د پوځي چارو شنونکی توریالی ځاځی وايي: « پاکستان هغه هېواد دی چې له پيدا کېدو راهیسې یې زموږ د هېواد پر وړاندې ناوړه بشري جنایتونه ترسره کړي او لا ادامه ورکوي او دوی تل د خپلو موخو لپاره پلمې لټوي. د دې لپاره باید افغانان اوس یو لاس او یوموټی شي، ترڅو دا ډول جنایت کار ګاونډی هېواد ونه شي کولی زموږ د هېواد پر ضد ناروا کړنې ترسره کړي.»
د نړیوالو اړیکو شنونکی سمیرانګار وايي:« د دا ډول وضعیت دوام نه د افغانستان پر ګټه ده نه د پاکستان. دواړه لوري باید د تاوتریخوالي پر ځای د خبرو، اقتصادي همکاریو او سیاسي تفاهم لوري ته لاړ شي.»
د تورخم لارې د تړلي پاتې کېدو په اړه دغه نظرونه داسې مهال دي چې ننګرهار کې د ځايي مسوولینو د مالوماتو له مخې، دا احتمال شته چې ياده لار د سوداګرۍ پرمخ پرانیستل شي.
د دوی په خبره، د کرښې دواړو خواوو سوداګرو او قومي مشرانو د هڅو په پایله کې ښايي لاره خلاصه شي.
