وروسته له هغې چې پاکستان د محمد شریف الله په نوم یو کس د داعش ډلې د غړیتوب او د کابل هوايي ډګر په برید کې د لاس لرلو په تور ونیو او امریکا ته یې وسپاره، هغه شکونه په یقین بدل شول چې د پاکستان تر کنټرول لاندې خیبرپښتونخوا او بلوچستان کې د ياد هېواد له لوري تمويلېدونکې جنګي ډلې روزل کېږي او منظم مرکزونه لري.
سرپرست حکومت هم وړاندې ویلي و چې په پاکستان کې د داعش ډلې د غړیو نیول د دې ښکارندويي کوي چې دا ډله د افغانستان برعکس په پاکستان کې ده.
د سیاسي چارو شنونکي وايي، پاکستان سیمې او ګاونډيو هېوادونو ته د داعش په شمول نورې جنګي ډلې د خپلو اهدافو د تحقق لپاره لېږي او په دې توګه يې سيمې ته ګواښ پېښ کړی.
د سیاسي چارو شنونکی حکمتالله حکمت وايي:« زموږ په سیمه کې د داعش ټېکه دار، روزونکی او صادروونکی د پاکستان پوځ او استخبارات دي. دوی اوس له غربي نړۍ او غربي استعمار سره پر ګډه د داعش خراسان ډلې څو څانګې د پاکستان تر کنټرول لاندې په پښتونخوا او بلوچستان کې فعاله کړې دي. په دې ټوله نړۍ خبره ده چې د پاکستان د پوځ او آی.اېس.آی له خوا روزل کېدونکې داعش ډلې د ګاونډیانو د تهدید او یوې نړیوالې تروریستي پدیدې په توګه د پاکستان د ګټو لپاره کارول کېږي.»
د سیاسي چارو شنونکی کمال ناصر اصولي وايي: « د داعش په شمول سخت دریځې د تاریخ په اوږدو کې پاکستان روزلې دي او دا یې ښه مثال دی چې د داعش یو کس یې په امریکا خرڅ کړ. پاکستان تل سخت دریځې ډلې روزلې، ټوپک یې ورکړی او د خپلو ګاونډیانو نظامونه یې پرې رنګ کړي او بیا یې د همدغو کسانو پر سر تجارت کړی.»
ځینې نور بيا پر دې باور دي چې پاکستان په قبايلي سيمو کې د ناامنيو مهارولو په پلمه په دې هڅه کې دی چې په يادو سيمو کې ډيورنډ فرضي کرښې ته څېرمه خپلې تجهيز کړې ډلې ځای پر ځای او د افغانستان ناامنه کولو په موخه ترې ګټه واخلي.
د ننګرهار ولايتي شورا پخوانی ریيس احمد علي حضرت وايي:« اسلام اباد غواړي د خپلو اهدافو لپاره د تورخم جګړې په پلمه د ډيورنډ فرضي کرښې ته څېرمه ځينې سیمې له خلکو خالي او داعش په کې ځای پر ځای کړي چې دا کړنه به یو ستر ګواښ رامنځته کړي.»
په ټوله کې باور دا دی، که نړیواله ټولنه د دې ستر مشترک ګواښ مخه ونه نیسي، نه یوازې دا چې د پاکستان ګاونډیو هېوادونو او سیمې ته به ستونزې جوړې شي، بلکې د نړۍ امنیت به هم وګواښي.
د سیاسي چارو شنونکی شهزاده مسعود وايي: « که چېرې نړیواله ټولنه په یوه واحد موقف د ترهګرۍ د دغو مرکزونو مخه ونه نیسي، زه فکر کوم نه یوازې دا چې سیمې او ګاونډ ته به ستونزې پیدا کړي، بلکې نړۍ ته به هم مشکلات پیدا کړي.»
د سیاسي چارو شنونکی ادریس محمدي ځاځی وايي: « نړیوال باید غوڅه پرېکړه او اقدام وکړي، ترڅو د دغه شان ډلو ټپلو او خوځښتونو د فعالیت مخنیوي لپاره د افغانستان حکومت ته لاس ورکړي، ترڅو د دغه شان ډلو مخه ونیول شي.»
د سیاسي چارو شنونکي غوښتنه کوي چې نړۍ باید د هغو ډلو د مرکزونو له منځه وړلو لپاره جدي اقدام وکړي چې د پاکستان ملاتړ ورسره دی او روزنيز کمپونه یې ورته جوړ کړي دي.
