د دوحې تړون د پنځمې کالیزې په پوره کېدو سره د اسـلامـي امـارت ویاند ذبیح الله مجاهد نیوکه کوي چې د بندیزونو د لرې کولو او له افغانستان سره د اړیکو د عادي کولو په برخو کې امريکا د دوحې هوکړه نقض کړې ده.
د مجاهد په خبره، د دې بندیزونو له امله بېلابېلو هېوادونو ته د اسلامي امارت د لوړ پوړو چارواکو سفرونه له خنډ او ځنډ سره مخ شوي دي.
هغه زیاته کړې: « موږ او تاسو شاهدان یو چې د دوحې تړون په نتیجه کې افغانستان د استقلال او آزادۍ پړاو ته ورسېد او په پایله کې یې بهرني ځواکونه له افغانستانه ووتل؛ دا یوه لویه لاسته راوړنه وه. په دې تړون کې له مقابل جهت یا امریکایانو سره دوې اساسي خبرې وې: یوه دا چې امریکايي ځواکونه به له افغانستانه وځي او دویم دا چې د افغانستان حکومت به اجازه نه ورکوي چې د افغانستان خاوره د امریکا پر ضد استعمال شي. دا دواړه کارونه شوي او زه فکر کوم د تړون اساسي خبرې حل دي. مګر په تړون کې ځینې داسې برخې هم وې چې امریکایانو باید عملي کړې وای، خو تر اوسه یې نه دي عملي کړې. د مثال په توګه، د تحریم لېستونه پای ته رسېدل او له افغانستان سره د ښه تعامل ګامونه اخیستل، دا نه دي شوي. موږ دعوت ورکوو چې دا برخې هم باید تکمیل شي.»
د اسلامي امارت ویاند د خپلو خبرو په دوام ویلي، د دوحې تړون د یوه پړاو لپاره و او نور اعتبار نه لري.
دغه راز مجاهد زیاتوي، اسلامي امارت اوس د خپلو اصولو له مخې وړاندې ځي نه د دوحې تړون له مخې.
مجاهد په دې اړه وايي: « همدارنګه د تړون عمومي محتویات هم د افغانستان اسلامي امارت له خوا مراعات شوي او موږ په دې اړه کومه ستونزه نه لرو. دا تړون د یوې مرحلې لپاره و، له دې وروسته د امارت خپل حاکمیت دی، موږ د تړون پر اساس مخکې نه ځو، بلکې د خپل نظام د اصولو له مخې مخکې ځو. دا له امریکایانو سره یو تړون و چې په یوه مقطع کې پای ته ورسېد.»
د اسلامي امارت ویاند له امريکا غوښتنه کړې چې پر سرپرست حکومت لګول شوي محدودیتونه لرې کړي.
