د ریاست الوزرا اقتصادي مرستیال ملا عبدالغني برادر اخوند د یوه لوړ پوړي پلاوي پر مشرۍ ازبېکستان هېواد ته په رسمي دوه ورځيني سفر تللی.
د دې پلاوي په ترکیب کې د کانونو او پټرولیم وزارت سرپرست هدایت الله بدري، د ټرانسپورټ او هوايي چلن وزارت سرپرست ملا حمید الله اخند زاده، د صنعت او سوداګرۍ وزارت سرپرست نورالدین عزیزي، د کرنې، اوبو لګولو او مالدارۍ وزارت سرپرست عطاالله عمري، د افغانستان بانک رییس نوراحمد آغا او د مالیې وزارت چارواکي شامل دي.
د اسلامي امارت سرپرست حکومت د دې سفر موخه د افغانستان او ازبېکستان ترمنځ د سیاسي، اقتصادي، سوداګریزو او ټرانیزیټي اړیکو له پراختیا سربیره، په افغانستان کې د ازبېک پانګوالو د پانګوونې جذبول بللې.
تمه کېږي چې دغه سفر به د دواړو هېوادونو ترمنځ اقتصادي فرصتونه لا ډېر کړي او دغه راز به افغان پلاوی له ازبېک چارواکو سره پر بېلابېلو سکټوري برخو کې خبرې ولري.
د اسلامي امارت د ویاند مرستیال حمدالله فطرت په دې اړه وايي: « د سفر موخه د افغانستان او ازبېکستان ترمنځ د ساسي، اقتصادي، تجارتي او ټرانزیټي اړیکو پراختیا او د ازبېکستاني پانګوالو د جذب لپاره زمینه برابرول ده. ټاکل شوې د دواړو هېوادونو چارواکي په بېلابېلو سکټورونو کې د همکاریو پر لارو چارو خبرې وکړي او تمه کېږي چې دا سفر به د دواړو هېوادونو ترمنځ د اقتصادي همکاریو لپاره نوي فرصتونه برابر کړي او د افغانستان د اقتصادي ودې لپاره یو مهم ګام وګرځي.»
د اقتصادي چارو کارپوهان بیا ازبېکستان په سیمه کې مهم هېواد بولي او وايي، دا هېواد کولی شي د افغانستان په اقتصادي وده کې مهم رول ولوبوي.
د دوی په باور، تاشکند ته د ریاست الوزرا د اقتصادي مرستیال سفر کولی شي د دواړو هېوادونو ترمنځ اقتصادي فرصتونه رامنځته کړي.
د اقتصادي چارو کارپوه صمیم جاهد وايي: « دوست هېواد ازبېکستان ته د رییس الوزراء اقتصادي مرستیال سفر کولی شي د نویو اقتصادي خوځښتونو رامنځته کولو او د شته ستونزو هوارولو کې مهم رول ولوبوي. همدارنګه ازبېکستان کولی شي د افغانستان اقتصادي وده کې فعال رول ولوبوي.»
د افغانستان او ازبېکستان ترمنځ سوداګریزې اړیکې د تېر په پرتله پراخه شوې او افغان سوداګر یو شمېر هم خوراکي او غیر خوراکي توکي له یاد هېواد را واردوي.
ازبېکستان په سیمه کې مهم اقتصادي هېواد یاديږي. د اقتصادي چارو کارپوهان وايي، له دې هېواد سره د افغانستان د اړیکو پیاوړتیا به د افغانانو پراقتصادي ودې مثبت اغېز ولري.
