په افغانستان کې د جمهوري نظام سقوط او د امریکا او ناټو پوځي حضور له پای ته رسېدو سره سم، لسګونه زره افغانان امریکا او اروپايي هېوادونو کې د پناه اخیستلو په موخه ګاونډیو هېوادونو، په ځانګړې توګه پاکستان او ایران ته واوښتل، خو د درېیو کالو په تېرېدو سره یې نږدې نیمايي لاهم په دغو هېوادونو کې له ناڅرګند برخلیک سره پاتې دي.
تازه د پاکستان حکومت له اسلام اباد د زرګونه افغان ګډوالو ایستلو پرېکړه کړې او له پلازمېنې یې د پاکستان نورو ښارونو ته د دوی د انتقال لپاره د مارچ تر ۳۱ مې وخت ټاکلی.
دغې پرېکړې په اسلام اباد کې مېشت افغانان اندېښمن کړي او پرهغو هېوادونو یې د همکارۍ غږ کړی چې د انتقال پروسه کې ورسره شامل دي.
په پاکستان کې مېشته افغان پناه غوښتونکې مزدلفه کاکړ وايي: « د افغان کډوالو تر ټولو ډېره اندېښنه دا ده چې هغو هېوادونو له دوی سره ژمنه کړې وه چې دوی باید درېیمو هېوادونو ته لاړ شي، ترڅو له هغه ځایه یې امن هېوادونو ته انتقال کړي، مګر دغه هېوادونه اوس چوپ پاتې دي. په داسې یوه وضعیت کې چې د پاکستان د حکومت له خوا دومره آزار او اذیت روان دی، هغه هېوادونه باید د افغانانو د کېسونو پروسه چټکه کړي چې ژمنه یې کړې وه، باید دوی افغانان له دې ځایه انتقال کړي.»
په ورته مهال، د کډوالو چارو شنونکي پر پاکستان نیوکه کوي چې دوی د نړیوالو قوانینو له مخې، د کډوالو حقونه تر پښو لاندې کړي او له نړیوالو بنسټونو غواړي چې په پاکستان فشار راوړي، څو کډوالو ته وخت ورکړي چې د پناه غوښتنې کېسونه یې بشپړ شي.
د کډوالو چارو شنونکی ابو الحسن صالحي وايي: « پاکستان پر مهاجرانو د فشار راوړلو له لارې غواړي چې د مهاجرو له ملاتړو هېوادونو او نړیوالو بنسټونو مالي امتیازونه ترلاسه کړي. باید د مهاجرانو ملاتړ هېوادونه، نړیوال بنسټونه او د بشري حقونو ادارې پر پاکستان فشار راوړي چې له جبري شړلو او ضرب الاجل ټاکلو لاس واخلي.»
د کډوالو چارو شنونکی نظیر نظري وايي: « په پاکستان کې د افغان مهاجرینو وضعیت لکه څرنګه چې لیدل کېږي، د اندېښنې وړ دی. د امریکا د ولسمشر له فرمان وروسته، دغه مهاجران خپل راتلونکي ته اندېښنه لري. دغه فرمان سبب شوی چې مهاجران په ګڼو حقوقي، رواني او اقتصادي ستونزو سره مخ شي. همدارنګه، له یوې لخوا د پاکستان سختګیرانه وضعیت او په پراخه کچه د مهاجرانو شړل او له بلې خوا د هغوی د بیا مېشتېدنې د پروسیې اوږدېدل سبب شوي چې دغه مهاجران له ګڼو ستونزو سره مخ شي.»
دا په داسې حال کې ده چې د پاکستان د بهرنیو چارو وزارت ویلي، تېرو درېیو کالو کې نږدې ۸۰ زره افغانان چې نورو هېوادونو کې د دایمي اوسېدلو په موخه دغه هېواد کې مېشت وو، درېیمو هېوادونو ته وتلي او دا مهال شاوخوا ۴۰ زره نور افغانان په اسلام اباد کې د بیا مېشتیدنې پروګرام لپاره د کډوالۍ ژوند تېروي.
