په غزني ولایت کې لسګونه کسان راټول شوي، ترڅو د جرمونو نړیوالې محکمې د څارنوال هغه ادعا او غوښتنه وغندي چې وايي، د اسلامي امارت رهبر او قاضي القضات باید د بشري ضد کړنو له امله ونیول شي.
لاریون کوونکي د اسلامي امارت پر ملاتړ او د نړیوالې محکمې ضد شعارونه لېږدول او یاده پریکړه یې غیرعادلانه او ظالمانه وبلله.
قومي مشر حاجي موسی سعادت وايي: «ګستاخانه خبرې یې کړې، تاسو د ولس جوش او احساسات وینئ. دوی زموږ نظام، دې ولس او مسلمان ملت ته په سپکه سترګه کتلي. موږ غوښتنه کوو چې دوی دې خپله خبره بېرته واخلي او بیا دې دا عمل نه تکراروي.»
د غزني ولایت یو تن اوسېدونکی وايي: « نړیوالو چې کومه خبره او فیصله کړې، دا د افغانستان د خلکو لپاره هېڅ د منلو نه ده او په عادي سترګه هم نه ورته ګوري.»
لاریون کې یو شمېر ځايي مسوولینو هم ګډون کړی او وايي، د جرمونو نړیوالې محکمې ادعاوې دوی ته د منلو او زغم وړ نه دي او د یادې محکمې څارنوال او قاضیان دې خپلې ادعاوې او پریکړه بېرته واخلي.
د غزني ولایت د اطلاعاتو او فرهنګ رییس وايي: « افغان ولس او په ځانګړې توګه د غزني مېړنی ولس غوښتنه کوي چې د نړیوالې جنايي محکمې هغه خبرې او تورونه چې د اسلامي امارت په مشرانو پسې یې کړې دي، په بشپړه توګه ردوي او غواړي چې دا خبرې بېرته واخیستل شي.»
ورته مهال، د اسلامي امارت غړي ملا محمد رسول اخوند رسنیو ته استول شوې خبر پاڼه کې د جرمونو د نړیوالې محکمې هغه پرېکړه غندلې ده چې د اسلامي امارت د مشر او قاضي القضات د نیولو غوښتنه په کې شوې.
په اعلامیه کې لیکل شوي، دا ډول پریکړې غیرعادلانه دي او افغانان د اسلامي شریعت له مخې دا ډول پریکړو ته کوم ارزښت نه ورکوي.
اخوند زیاته کړې:« هر افغان د خپل مشر او کشر د ساتنې او دفاع لپاره حاضر دی او داسې غیر سنجیده پرېکړې نړۍ ته کومه ګټه نه رسوي . د افغانستان ولس له اسلامي امارت سره دی او د ولس اراده داسې ظالمانه او له انصاف لرې پریکړې نه شي بدلولی.»
له غزني ولایت سربېره د هېواد په ځینو نورو سیمو کې هم د اسلامي امارت پر ملاتړ او د نړیوالې محکمې د پریکړې خلاف خلکو غونډې ترسره کړې.
د جرمونو نړیوالې محکمې څارنوال د جنورۍ پر ۲۴مه د اسلامي امارت رهبر شیخ هبة الله اخوندزاه او د سترې محکمې قاضي القضات د ښځو او بشري حقونو په نقض تورن کړل او د یادې محکمې له قاضیانو یې غوښتنه وکړه چې د نیولو حکم یې صادر کړي.
د اسلامي امارت د بهرنیو چارو وزارت د جرمونو نړیوالې محکمې پرېکړې ته غبرګون کې وویل، دا ډول تورونه او پرېکړې غیرعادلانه او سیاسي هڅول شوې موضوع ده او لګېدلي تورونه یې رد کړل.
