له پاکستان تازه خپاره شوي راپورونه څرګندوي چې د دې هېواد پولیسو سلګونه افغانان چې ښځې او ماشومان هم په کې شامل دي، نیولي دي.
په خواله رسنيو کې لاس په لاس کېدونکو ویډیوګانو کې ښکاري چې پاکستاني پولیس په اسلام اباد کې د افغانانو د نیولو لړۍ چټکه کړې او د نیولو لپاره يې پر کورونو چاپې وهلې دي.
په خيبر پښتونخوا کې د ملي جمهوري غورځنګ مشر پر خپله اېکس پاڼه د پاکستان حکومت له لوري دغه اقدام د بشري حقونو ښکاره نقض ګڼلی او زیاته کړې يې ده چې د پاکستان له لوري دا ډول کړنې د جدي کینې درلودلو په مانا دي.
د ملي جمهوري غورځنګ مشر محسن داوړ ویلي: « د اسلام اباد له بي ۱۷ سیمې د هغو افغانانو نیول چې ماشومان او ښځې هم په کې شامل دي او قانوني اسناد په لاس لري، د ژورې اندېښنې وړ دي. دا ډول ځورونې د بشري حقونو ناوړه نقض او د افغانانو پر وړاندې د کېنې او نفرت لرلو ښکاره څرګندونه کوي.»
له دې سره سم، د دوشنبې په ورځ د افغانستان له خبریالانو د ملاتړ سازمان هم د بشري حقونو له مدافعو نړیوالو سازمانانو غوښتي چې د افغان خبریالانو د خوندیتوب لپاره جدي اقدامات وکړي.
دې سازمان په خپره کړې اعلامیه کې د پاکستان له حکومت غوښتي چې د افغان خبریالانو آزادۍ او غوښتنو ته درناوی وکړي او د افغانانو له ځورونو ډډه وکړي.
د اعلامیې یوه برخه:« د پاکستان له دولت غوښتنه کوو چې د افغان خبریالانو د حقونو آزادۍ ساتنه وکړي او هغوی ته دې د اوسېدو لپاره قانوني اسناد چمتوو کړي او د بې ګناه خلکو له ځورونې دې لاس واخلي.»
په ورته مهال، د کډوالو او بېرته راستنېدونکو چارو وزارت مسوولینو چې په اسلاماباد کې يې د افغانانو د نیول کېدو په اړه زموږ اړیکو ته ځواب رانه کړ، څو ورځې وړاندې یې تایید کړه چې په پاکستان کې د افغان کډوالو وضعیت په اړه یې د دې هېواد له چاروکو سره خبرې کړې.
د سیاسي چارو کارپوهان وايي، پاکستان له څه باندې څلورو لسیزو راهیسې له افغان کډوالو د فشار وسيلې په توګه ګټه پورته کوي.
په پاکستان کې ازاد خبريال نعمتالله وايي: « د دغې پالیسي مطابق غیر قانوني مقیم افغانانو خلاف کاروایانې چټکې شوې، افغانان نیول کېږي، په جېلونو کې اچول کېږي او خپل هېواد ته لېږل کېږي.»
د سياسي چارو شنونکی عزیز معارج وايي: « د افغان کډوالو په ځورونې سره پاکستان غواړي پر اسلامي امارت فشار راوړي او خپلې غوښتنې پرې ومني؛ په دې کې بل کار نه شته. پاکستان په کور دننه ګډوډي لري او غواړي چې دا ډول ادعاوې وکړي لکه څرنګه چې د هند د بهرنیو چارو وزارت ویاند هم تایید کړه. د حل بهتره لاره یې دا ده چې دواړه هېوادونه سره کېني او د خبرو اترو له لارې دا ستونزه حل کړي، اړتیا نه شته چې فشار او خشونت ته لاس واچوي.»
پاکستان له تېر یوه کال راهیسې نږدې یو میلیون افغان کډوال په جبري توګه افغانستان ته راستانه کړي او په کراتو یې خبرداری ورکړی چې ټول بې اسنادو افغان کډوال به بېرته افغانستان ته ستانه کړي.
