د امریکا بهرنیو چارو وزیر انټوني بلېنکن له نیویارک ټایمز ورځپاڼې سره په يوه تازه مرکه کې له افغانستانه د امریکايي ځواکونو د ایستلو په اړه د ولسمشر بایډن له پرېکړې ملاتړ کړی او ویلي یي دي چې د افغانستان له جګړې اخیستو تجربو په منځني ختیځ او اوکراین کې مثبتې پایلې ورکړې.
بلېنکن له افغانستانه د امریکايي ځواکونو ایستل د ولسمشر جوبایډن لاسته راوړنه یاده کړې او یاده پرېکړه یې په نړۍ کې د واشنګټن د لوړ موقف ساتلو په تړاو ارزښتمن اقدام ګڼلی.
نوموړی دغه پرېکړه د امریکايي ځواکونو د خوندیتوب لپاره مهمه بولي او زیاتوي، د میلیاردونو ډالرو پر مصرفولو سربېره یې د ناټو غړیو هېوادونو په همکارۍ جګړې کومه مثبته پایله نه لرله او مخالفینو يې هڅه کوله چې واشنګټن د افغانستان په جګړه کې یوه لسیزه نور هم ښکېل کړي.
هغه زیاتوي:« لومړی، زه د امریکا اوږدې جګړې پای ته رسولو په اړه بښنه نه غواړم او دا د امریکا د ولسمشر لاسته راوړنو ته یوه اشاره هم ده؛ ځکه چې د امریکايي ځواکونو ژوند یې خوندي کړ. یو واقعیت دا دی چې امریکا یو بل نسل نه درلود چې د افغانستان لپاره یې جګړه کړې او وژل شوي وای. بل زموږ دوښمنانو دا غوښتل چې موږ یوه بله لسیزه هم په جګړه کې ښکېل شو.»
انټوني بلېنکن د دې پوښتنې په ځواب کې چې آيا د ځواکونو له ایستلو پرته د شاتګ بدیله لاره نه وه؟ ویلي، د ځواکونو له بهر کېدو وروسته یې له مسلکي او تجربه لرونکو ډېپلوماټانو سره یو ځای د ۴۰ سپارښتنو یو راپور اروزلی دی.
بلېنکن دغه راپور له افغانستانه د امریکايي ځواکونو د ایستلو ناکامو او بریالیو درسونو او تجربو او دغه راز په راتلونکې کې د تېروتنو د اصلاح لپاره یو مهم پرمختګ یاد کړی.
د امریکا بهرنیو چارو وزیر ویلي: « هغه توصیې او سپارښتنې چې موږ په افغانستان کې زده کړې، په اسرائیلو، لبنان او سوډان کې مو عملي کړې دي.»
د سیاسي چارو کارپوهان بیا باور لري چې د جوبایډن ادارې د کاري مودې له پای ته رسېدو سره به د دې هېواد نوی حکومت په خپلو بهرنیو پالیسو کې تر یوې کچې بدلون راولي.
د دوی په خبره، د امریکا اوسني حکومت راتلونکي حکومت ته د ستونزو د زیاتېدو لپاره ګڼې ننګونې رامخته کړې دي.
د پوهنتون استاد فیض محمد ځلاند وايي: « د بایډن حکومت مخ په تمامېدو دی او په ځینو مسایلو لکه له افغانستانه د ځواکونو په ایستلو کې دوی د ملامتۍ لوبه پيل کړې، ترڅو د ټرمپ اداره له ځینو ننګونو سره مخ کړي. له افغانستانه د امریکا نظامي وتل حتمي وو؛ ځکه دا د امریکا په تاریخ کې تر ټولو اوږده او د نرخ له نظره تر ټولو قېمتي او د ستراتیژیک عمق له نظره هم قېمتي او بدرنګه جګړه وه.»
بلېنکن په داسې حال کې له افغانستانه د امریکايي ځواکونو د وتلو ملاتړ او د دې هېواد د ولسمشر د پرېکړې ننګه کوي چې څو ورځې وړاندې د دې هېواد ملي امنیت سلا کار جېک سلیوان ویلي و چې له افغانستانه د امریکايي ځواکونو له ایستلو پرېکړې په غبرګون کې یې خپل استعفا لیک ولسمشر جوبایډن ته سپارلی و خو استعفا یې نه وه منل شوې.
