بل خوا بیا چین وايي، کابل کې یې سفارت په عادي ډول چارې پر مخ بیایي او طالبانو سره خپلو اړیکو ته دوام ورکوي.
د چین بهرنیو چارو وزارت ویاند ژاو لېجیان پر امریکا غږ وکړ،چې د افغانستان میلیاردونه کنګل کړي ډالر دې خوشې کړي او دافغانانو غوښتنو ته دې درناوی وکړي.
لېجیان زیاته کړه:« دا پانګه د افغانستان خلکو ته او د همدې خلکو له خوا باید ولګول شي. امریکا باید دا پانګه له کوم حکم پرته کنګل نه کړي. امریکا باید د افغانستان مشروع او معقولو غوښتنو ته غوږ کېږدي، بندیزونه پرې ونه لګوي او اقتصاد او بیارغونې ته یې زیان و نه رسوي.»
کابل کې د چین سفیر په ګډون د پاکستان سفیر د سرپرستې کابینې له اعلان راوروسته لومړي بهرني استازي ول،چې وړمه ورځ یې د بهرنیو چارو چارسمبالي وزیر امیرخان متقي سره ولیدل او د مرستو ډاډ یې ورکړ.
سیمه کې د امریکا دا کلک سیالان داسې مهال له طالبان سره د خپل نرم دریځ خبرې کوي،چې طالبان د یوې میاشتې په تېریدو هم کوم هېواد په رسمیت نه دي پیژندلي او نړیوالې ټولنې په افغانستان کې حاکم حکومت سره د خپلو راتلونکو اړیکو لپاره یو لړ شرایط وړاندې کړي دي.
