د پوهنتون یو شمېر استادان په ټولنه کې د خلکو اړتياوو ته په کتو د عصري زده کړو پر پیاوړتیا ټينګار کوي او وايي، دا د انسان لومړنی حق دی چې طبي اسانتیاوو ته لاسرسی ولري، خو د افغانستان په ډېری سیمو کې خلک له دې لاسرسي بې برخې دي.
استادان له طب پوهنځي د نارینه زده کړیالانو د فراغت غونډې پرمهال وویل، په طبي او نورو زده کړو کې د نجونو نه موجوديت نه جبرانېدونکې تشه ده.
دوی دغه راز زياتوي، دا مهال د یو شمېر ولايتونو په لرې پرتو سيمو کې خلک روغتيايي خدمتونو ته د لاسرسي په هڅه کې دي، خو د متخصصو ډاکټرانو نه شتوالي له امله له ستونزو سره مخ دي.
د پوهنتون استاد عبدالباسط الهام وايي: « دا به ډېره ښه وای چې نن موږ ښځینه فارغانې هم درلودلی. زموږ ټولنه د طب برخې او فارغانو ته ډېره اړتیا لري. موږ حتی په ځینو ولایتونو کې د ولایت پر کچه د نسايي ولادي متخصصین نه لرو. موږ له خپلو مشرانو غوښتنه کوو چې ښځو او نجونو ته هم د زده کړو زمینه برابره کړي او په دې سره د ټولنې دغه خلا رفع کړو.»
د پوهنتون یو بل استاد وايي: « د صحي برخې پر بنسټ دا د انسانانو لومړنی حق دی چې باید ډاکټر ته لاسرس ولري. تاسو یقین وکړئ تاسو د وطن په ډېر ولایتونو کې متخصص ډاکټران نه شته. یقینا ً هغوی هم انسانان دي او له مرکز لرې کومو ځایونو کې چې اوسېږي، د ژوند دغه اولیه ضرورت ته یې پوره اړتیا ده.»
د اسلامي امارت له بیاځل واکمنېدو راهیسې له شپږم ټولګي پورته د نجونو ښوونځي تړلي او له شاوخوا دوه کالو راهیسې ښځې او نجونې پوهنتونونو ته له ورتګ هم منع شوې دي.
له دې سره، سرپرست حکومت د ښځینه زده کړو په تړاو خپله وروستۍ پرېکړه کې د نجونو نیمه عالي طبي زده کړې هم تر امر ثاني وځنډولې.
