کابل کې د ځانمرګي برید مرګ ژوبله په زیاتېدو ده.
کابل ښار د اورانوس د ودونو په تالار کې چاودنې ۴۳ کسان وژلي او ۸۳ ټپيان دي.
کورنیو چارو وزارت وايي، دا یو ځانمرګي برید و.
د پېښې ټپیان ځايي روغتونونو ته لېږدول شوي او سیمې ته ګڼ شمېر امنیتي ځواکونه ورغلي دي.
عامې روغتیا وزارت وايي، پېښه کې لږ تر لږه ۴۳ کسان وژل شوي او ۸۳ نور ټپیان دي.
د ځايي چارواکو په وینا، ښايي د تلفاتو شمېر کې بدلون راشي.
پېښه له تیر ماښام سره سم څه د پاسه شپږ بجې د کابل هوایي ډګر سړک په اوږدو کې د ‘اورانوس ‘ په نوم د ودونو او غونډو په یوه تالار کې رامنځته شوه.
برید د اسلام د ستر پیغمبر حضرت محمد ص د زوکړې په مناسبت جوړې شوې غونډه کې شوی.
ویل کېږي دغې غونډې ته لسګونه دیني عالمان او عام خلک ورغلي وو.
ولسمشر محمد اشرف او د ملي امنیت شورا دغه ترهګریز برید غندلی.
اشرف غني ویلي، د بې ګناه وګړو په ځانګړې توګه د دیني علماوو او د قران عظیم الشان د حافظانو وژل، چې د حضرت محمد (ص) د زوکړې مبارکې ورځې لپاره راغونډ شوي وو، د اسلام او د افغانستان د خلکو د وحشي دښمنانو ترهګریزه تګلاره او شومه دسیسه ده.
د ملي امنیت شورا، د دغې ترهګریزې پېښې د غندلو تر څنګ، یو وار بیا په هر ځای کې د ترهګرو پر ځپلو ټینګار کوي او ډاډ ورکوي، چې یاده پېښه به په هر اړخیزه توګه وڅېړل شي.
بلخوا افغانستان کې د ملګرو ملتونو دفتر یوناما ویلي دا یو بوږنونکی برید دی.
د پاکستان لومړي وزیر عمران خان هم دغه برید یوه بې رحمه ترهګریزه کړنه بللې او د پېښې د قربانیانو خپلوانو ته یې د خواخوږۍ پیغام استولی.
طالب ویاند ذبیح الله مجاهد هم رسنیو ته په استول شوي پیغام کې دا برید په کلکه غندلی.
امریکا هم کابل کې د تېر ماښام برید وغانده.
د امریکا بهرنیو چارو وزارت په یوې اعلامیې کې د تېر ماښام ځانمرګی برید غندلی او د پېښې قربانیانو سره یې غمرازي شریکه کړې ده.
اعلامیې کې ویل شوي چې دغه برید د وسله والو ظلم او تاوتریخوالی په ډاګه کوي.
اعلامیې زیاته کړې چې امریکا په افغانستان کې سولې او ثبات ته ژمنه ده او په دې برخه کې به همکارۍ ته دوام ورکوي.
ولسمشرۍ ماڼۍ ویلي، د دغې پېښې په مناسبت به نن چهارشنبه افغانستان کې د ملي ماتم ورځ وي او د افغانستان بیرغ به نیمه ځوړند وي.
پر ټولنیزو رسنیو هم د دغه برید سخته غندنه شوې او دا کار یې د اسلام د دښمنانو بللی.
ویل کېږي د برید پر مهال تالار کې سلګونه کسان یو ځای شوي وو، چې ډېر شمېر دیني عالمان هم پکې شامل وو، خو تر اوسه مالومه نه ده، چې وژل شویو او ټپیانو کې څومره شمېر دیني عالمان شامل دي.
تیره ورځ د اسلام پیغمبر د زوکړې په مناسبت افغانستان کې عمومي رخصتي وه او په پراخه کچه دغه ورځ ونمانځل شوه.
دا لومړی ځل دی، چې افغانستان کې د میلاد النبي ورځې پر مراسمو ځانمرګی برید کېږي.
له تېرې ورځې څخه پوره ۱۴۹۳ کاله وړاندې د الله ﷻ محبوب رسول دې دنيا ته په داسې حالت کې خپلې ښکلې سترګې پرانيستلې چې نړی ټوله د ګمراهۍ، ناپوهۍ، دښمنۍ او تباهۍ په سيند لاهو وه.
