اوس د پاکستان وېزه ترلاسه کول اسانه کار نه دی؛ خوخلک مجبوریتونه لري.
ننګرهار کې خلکو شکایت کړی، چې ولایتي ادارې د پاکستان وېزې اخېستلو لړۍ انحصار کړې.
والي د چارو د تنظیم او فساد مخنیوي لپاره کمېسیون جوړکړی او پرته د هغوی له امضاء او مهر یې د پاکستان په وېزو بندیز لګولی دی.
خلک او د ولس استازي وایي، ولایتي ادارې دا کار د خپلو ګټو په خاطر کړی او فساد تر پخوا اوس ډېر کېږي.
هلته خلک یوازې د والي له لورې د جوړ شوي کمېسیون امضاء او مهرته شپې په سړک سبا کوي او د پولیسو له لوري یې وهل او ډبول هم حتمي دي.
ولایتي اداره وایي، په ټول توان یې د ستونزو د حل هڅې روانې کړي.
دلته ناست خلک به په اوونیو انتظارکوي، چې د ولایتي ادارې له لوري د چارو د سمون په موخه د جوړشوي کمېسیون مهر او مضاء د وېزې په فورمه ترلاسه کړي، چې خلکو ته یې لوی سرخوږی جوړ کړی.
دلته ځینې ارزښتونه هم تر پښو لاندې کیږي او حتی د غرور شملې هم د وینو د خوږلن پټۍ شوي دي.
ناروغ لرونکي له خپلې بې وسۍ ژاړي او نور بیا له ولسمشر ګیلې لري، چې ننګرهار یې له پامه غورځولی.
د ولس استازي هم له دې بهیر راضي نه دي او نیوکې لري.
ولایتي اداره وایي، په ټول توان یې د ستونزو د حل لپاره هڅې پیل کړی، چې نږدې ورځو کې به د وېزو شمېر ډېر او هم به د وېزو د ورکړې پروسه خصوصي شرکت ته وسپارل شي.
د پاکستان د ویزې ترلاسه کولو په برخه کې د ولس چغې له کلونو پورته کېږي؛ خو تراوسه یې چا غږنه دی اورېدلی.
نیوکې دا دي چې ددې ستونزې په دایمي حل کې د یو شمېر چارواکو او اشخاصو تاوان دی نو ځکه حل لار نه لري.
