ډاکټر فهیمه رحمتي، چې له تېرو څو کلونو راهیسې یې د «هیله خیریه بنسټ» له لارې د کندهار له سلګونو کورنیو سره مرستې کړي دي وايي، تېره شپه طالبان د هغې کور ته ورغلي، له دې او د دې د کورنۍ له غړو سره یې تشدد کړی دی.
هغه له پېښې وروسته له خپل فېسبوک څخه په ژوندۍ بڼه را څرګنده شوه، په چیغو چیغو یې ژړل او ویې ویل، چې طالبانو د دې د ورور د بېولو هڅه کوله خو دې او د کورنۍ نورو غړو یې مخنیوی کړی دی.
ډاکټر فهیم رحمتي زیاتوي، چې طالبانو د دې په ګډون د دې د کورنۍ ښځینه غړي او ماشومان وهلي او له دوی یې ټلیفونونه اخیستي دي.
هغه د ژړا په حال کې وايي: ((ولې وحشت خپروئ؟ ایا حکومت داسې کېږي؟ ولې مو له وطن څخه فرار ته مجبوروئ، ایا د اسلام دین د داسې کړنو اجازه درکوي؟ ما ته د درېیو هېوادونو له خوا د کډوالۍ بلنه راغله، خو و مې نه منله، ما ویل چې وطن ما ته اړتیا لري))
هغه زیاتوي، طالبان په داسې حال کې په نیمه شپه د دې کور ته ور اوړي، چې نه د دولت کارکوونکې ده او نه یې په کور کې وسله لرله، بلکې د یوه خیریه بنسټ د مسوولې په توګه یې تل د طالبانو د کورنیو په ګډون د بې وزلو وګړو لاسنیوی کړی دی.
ډاکټر فهیمه رحمتي، چې د یوه خیریه بنسټ مشره ده د کندهار د وروستیو جګړو پر مهال یې نه یوازې سلګونو بې ځایه شوو کورنیو ته مرستې راټولې کړې، بلکې د سلګونو ناروغانو وړیا درملنه یې وکړه.
دا زیاتوي له دې هر څه سربېره نن دغه بد حالت سره مخامخ ده.
طالبانو تر اوسه په دې اړه څه نه دي ویلي.