د طالبانو ویاند مرستیال احمدالله وثیق وايي، دافغانستان بانک له لوري د حکومت د پخوانیو چارواکو اکونټونه بند شوي،خو د لامل په تړاو یې څه نه وايي.
دا پرېکړه له هرکلي او غبرګونونو سره مل ده،خو سوداګر وايي، د دوی بانکي کاونټونه هم بلاک شوي، چې له امله یې درانه مالي زیانونه ور اوښتي دي.
سوداګر شعور نیازی وايي:« د شرکتونو اکونټونه تړل شوي دي،پیسې ورته نه ورکول کېږي. دا د خلکو او دولت دواړو لپاره ډېر لوی زیان دی. زه د یوه سوداګر په توګه کله،چې راسره پیسې نه وي،نو اړ یم، چې خپل کارکوونکي رخصت کړم، سوداګري ودروم،ځکه زه کارو بار پر پیسو کوم، کله چې پیسې له ما سره نه وي، بانک ماته پیسې نه راکوي، نو اړ یم، کاروبارو بند کړم. په دې کې زه هم زیانمن کېږم،ولس هم زیانمن کېږي، دولت هم له عوایدو پاتې کېږي. متاسفانه هغه باور،چې بانکونه او دولت یې لري هغه هم له منځه ځي.»
خو د صنعت او سوداګرۍ خونې مرستیال یونس مومند وايي،د سوداګرو ستونزې یې چارواکو سره شریکې کړي او د حل ډاډ ورکړل شوی دی.
مومند زیاته کړه:« موږ ورسره خبرې پيل کړي دي. هېله شته،چې ټول بانکي سیسټمونه به په منظم ډول بېرته فعاله شي. د بانکي سیسټمونو فعاله کېدل لپاره باید ټول عواید یې وڅېړل شي او وروسته له هغې باید فعاله شي. دا به ډېر ښه وي.»
مومند وايي، ښايي ډېری سوداګر د جریمو له امله زیانمن شوي وي،ځکه په وینا یې توکې یې وارد کړي او نه شي کولای پيسې بهر ته ولېږدوي.
که څه هم په ټول هېواد کې خصوصي بانکونو فعالیت پیل کړی دی، خو مسوولین او سوداګر اندېښنه لري،چې د امریکا متحه ایالتو له لوري د افغانستان میلیاردونه ډالرو کنګل به هېواد له ستر اقتصادي ناورین سره مخ کړي.
