Skip to content
په بلخ ولایت کې يو شمېر خبريالان او د رسنيو کار کوونکي وایي،لا هم د اطلاع رسونې او راپور جوړولو په برخه کې له ګڼو او جدي ستونزو سره مخ دي.
دوی وایي، ډېری وخت د يو شمېر موضوعاتو په تړاو له راپور جوړولو څخه منع کېږي او همدا راز يې سرچينو ته لاسرسی محدود شوی دی.
خبریال عزيز کريمي وايي:« موږ ته وايي،چې تاسې په ازادانه ډول خپل کار وکړئ، خو له بده مرغه،کله چې موږ د يوې برنامې پوښښ لپاره ځو يا کوم راپور جوړوو، نو د فعاليت اجازه نه راکول کېږي. زموږ غوښتنه دا ده،چې مسوولين دې برخې ته جدي پاملرنه وکړي. که دوی رښتيا هم د بيان ازادي مني،نو خبريالان دې خپل کار ته پرېږدي.»
که څه هم بلخ کې مسوول چارواکي وايي، ډېر ژر به د رسنيو په تړاو د طالبانو طرزالعمل بشپړ او خبریالانو سره شريک شي، خو مزارشریف کې خبريالان وایي،د يادې کړنلارې نه شتون د دوی چارې ټکنۍ کړي دي.
خبریال جواد نبي زاده وايي:« موږ دا غواړو،چې ژر دې يو طرزالعمل جوړ شي او شته ستونزې دې حل کړای شي، خبريال بايد دا اجازه ولري،چې د ټولنې واقعيتونو ته انعکاس ورکړي،کله چې خبريال او رسنۍ د فعاليت اجازه او صلاحيت ونلري،په دې صورت کې بيا د بيان ازادي مانا نلري.»
په ورته مهال بلخ کې طالب چارواکي وايي، د رسنيو فعاليت ته ژمن دي او ډاډ ورکوي،چې له خبريالانو سره د ناوړه کړنو عاملينو سره به قانوني چلن وکړي.
شمال کې د دعوت او ارشاد کمېسيون مسوول عبدالقدير حليم وايي:« موږ ټولو رسنيو ته احترام لرو. ټولو رسنيو او خبريالانو ته د اصولو په رڼا کې د فعاليت اجازه ورکړل شوې. که په راتلونکي کې که ستاسې خبريالانو پر وړاندې کوم ناوړه چلن وشو،نو زموږ مسوولينو سره تماس ونيسئ، حتما به مقابل کس تر پوښتنو لاندې نيول کېږي او قانوني چلن به ورسره کېږي.»
اخوا د بلخ د اطلاعاتو او کلتور رياست په يوه خبرپاڼه کې له خبريالانو غوښتي،چې د يو شمېر کړيو له خوا پيل شويو اغتشاشي لاريونونو پوښښ لپاره دې نه ورځي،ترڅو زيانمن نه شي.
