Skip to content
یو شمېر پخواني طالب چارواکي وایي، د اسلامي امارت له لوري اعلان شوې سرپرسته کابینه د چارو سمون لپاره مهمه ده.
دوی وايي، شپږ میاشتې وروسته به رسمي کابینه او د رایو پر اساس به راتلونکی منتخب ولسمشر وټاکل شي.
پخوانی طالب چارواکی مولوي سیدالله حنفي وايي: «زه فکر کوم، اوسنۍ اعلان شوي سرپرسته کابینه به تر شپږو میاشتو پورې دوام وکړي او وروسته تر هغې به رسمي کابینه اعلان او د رایو له لارې به ولسمشر ټاکل کېږي.»
اخوا د چارو یو شمیر څارونکي تېرو دورو ته په کتو سره سرپرستې ادارې د هېواد په زیان بولي او د زر رسمي حکومت اعلانیدو غوښتونکي دي.
ټینګار دا دی چې په کابینه کې دې تخصصي او مسلکي کسانو ته ځای او پوره صلاحیت ورکړل شي.
د چارو څارونکی بهارمل بهار وايي: «رسمیت او پوره صلاحیت کارمند یا مدیر چې معرفي کیږي باید پوره صلاحیت ولري سرپرست وزیر سرپرست کارمند سرپرست رییس دا پوره صلاحیت هم نلري د چارو پر مخ وړلو لپاره او رسمیت هم نلري، ځکه په اضطراري حالت کې د نارمل کار په مخ وړلو لپاره ټاکل شوي او سني کابینه چې طالبانو اعلان کړي غوښټنه مو دا ده چې دواړه ملاحظو ته پام وکړي.»
اخوا ځینې نور بیا د لنډمهالې کابینې اعلانیدل د طالبانو له لوري مجبوري او د اوسني وخت اړتیا ګڼي.
د کندز پخوانی والي عمر ساپی وايي: «دې کې شک نه شته چې سرپرسته اداره به خپلې ستونزې ولري، خو طالبانو له دې پرته بله لار نه درلوده. طالبان دوه هدفه په سرپرسته اداره کې لري، یو هدف هڅه کوي چې د دې سرپرستې ادارې عکس العمل وګوري، چې نړیوال څه عکس العمل ښيي، د دوي تشکیلاتو ته داخلي سیاسیون څه عکس العمل ښيي.
همدارنګه دوی کوښښ کوي، خپل ظرفیتونه مالوم کړي، د سرپرستې ادارې له لارې چې دوی څومره ظرفیت لري، څومره کولی شي، د خپل حکومت چارې په ښه توګه په مخ بوځي که چیرې دوی په دغه برخه کې ستونزې ګوري، دوی به په اسانۍ هغو چارو ته رسیدنه کوي.»
خو د اسلامي امارت د مطبوعاتو غړی بلال کریمي بیا وايي، د چارو سمبالښت لپاره سرپرستې کابینې ته اړتیا وه او د کابینې پاتې غړي به هم ژر اعلان شي.
کریمي وايي: «زموږ هېوادولو په ټولو سیمو د خدماتو عرضه کولو ته اړتیا درلوده، تر څو د ولس اقتصادي او پرمختیایي چارو ته پر خپل وخت رسیدنه وشي او د زیانونو مخه ونیول شي، نو اسلامي امارت پریکړه وکړه چې د ولاړ چارو د پر مخ وړلو لپاره یوه کابینه اعلان کړي.»
پخوانی طالب چارواکي ډاډ ورکوي چې په راتلونکې رسمي کابینه کې به ټولو افغانانو ته ځای ورکول کېږي او ښځو ته به هم په کې ونډه ورکړل شي.
