د جلال آباد ښاروالۍ د يوې تازه پرېکړې له مخې په جلال آباد ښار کې د ژوندي چرګانو پلورل بند کړي. د دې پرېکړې له مخې، د چرګانو پلورونکي مکلف دي چې چرګان له خرڅولو وړاندې په دولتي مسلخ کې چې دامهال يوه قراردادي شرکت ته په قرارداد ورکړل شوی، حلال کړي.
د چرګانو پلورونکي وايي، په مسلخ کې د هر چرګ حلالولو په سر ترې ۶ افغانۍ اخيستل کېږي او دغه راز دا نه ده څرګنده چې د چرګانو پلورونکي هر ورځ څومره چرګان خرڅولی شي ترڅو یې د حلالولو لپاره مسلخ ته واستوي.
دوی د ښاروالۍ پرېکړه ناسنجول شوې بولي او غوښتنه کوي چې خپله پرېکړه له سره و ارزوي.
سوداګر خان الله کوټوال وايي: « چې دا د یوه کس تر انحصار لاندې شي او کشتارګاه ولري او هغه بیا حلا شوي چرګان دوکاندارانو ته ورکړي، دا موږ او ولس ته د منلو وړ نه ده. دا ځکه چې لومړی یو کس راځي او حلال شوي چرګان پلوري، دا نه شي پېژندل کېدای چې حلال دي که مردار.»
په همدې حال کې، د چرګانو یو شمېر پرچون پلورونکي وايي، په بازار کې یې پېردونکي له وړاندې حلال شویو چرګانو پر ځای ژوندي چرګان خوښوي او په خبره يې اوس چې تیار حلال کړای شوي چرګان پلوري، نو د پلور بازار یې خراب شوی.
د چرګانو یو تن پلورونکی وايي: « دا چرګان مو پرون راوړي او نن یې دویمه ورځ ده چې پاتې دي او اوس یې ګودامونو ته ښکته کوو. دا پرېکړه موږ ته د منلو نه ده. زموږ وطنوال حلال شوي چرګان نه خوري، هرڅوک یې په خپل طبیعت خوښووي او بیا یې حلالوي.»
د جلال آباد ښاروالۍ مسوولان په دې اړه له خبرو کولو ډډه کوي، خو د شنبې په ورځ يې په یوه خبرپاڼه کې ويلي چې جلال آباد ښاروالۍ دغه پرېکړه د خلکو روغتيا ته د پاملرنې او د ښار پاکوالي په موخه کړې.
د جلال آباد اوسېدونکي بیا ټینګار کوي چې ښاروالي دې د ژوندیو چرګانو پلور ته بېرته اجازه ورکړي او د چرګانو پر پلورونکو هم غږ کوي چې د چرګانو پاتې شوني دې منظمو ځایونو ته انتقال کړي.
د جلال آباد یو تن اوسېدونکی وايي: « دوکانداران او چرګ پلرونکي باید چټلۍ پاکې او ګند په ټاکل شوي ځای کې واچوي نه د سړکونو پرمخ. باید دېته یو سیسټم برابر شي او کثافات دانۍ ورته کېښودل شي.»
د ښار یو تن بل اوسېدونکی وايي: « په دې کې مړه چرګان هم راتلی شي او ښايي ځینې کسان مردار شوي چرګان په کې واچوي. هېڅوک دا نه غواړي چې تیار حلال شوي چرګان واخلي. خلک هغه چرګان خوښوي چې د دوی په مخ کې حلال او پاک شي.»
ننګرهار کې د چرګانو پلورونکو اتحادیې د مسوولینو له معلوماتو سره سم، په ختیځ زون کې د چرګانو د روزولو ۳۵ زره فارمونه فعال دي چې جلال آباد ته ترې هره ورځ شاخوا ۱۵۰ زره چرګان د پلور په موخه وړاندې کېږي.
خو د فارمونو مالکان وايي، د ښاروالۍ له تازه پرېکړې وروسته د چرګانو د پلور بازار کم رنګه شوی او له تېرو درېیو ورځو راهیسې شاوخوا دوه میلیونه افغانۍ زیان وراوښتی.
