په کندهار ولایت کې درنه او خونړۍ جګړه د طالبانو د ورتلو سره سم پای ته رسېدلې او اوس د کندهار اوسېدونکي د عادي ژوند د بيا پېلدو په هڅه کې دي.
دغه راز کندهار ښار ته اوس مهال خلک له نورو څنګ لورو ولایتونو د سیل لپاره هم ورځي.
د کندهار ګاونډیو ولایتونو اوسېدونکي وایې، کندهار ښار ته په سیل راغلي، ځکه په لوی کندهار کې امنیت ښه او وضعیت عادي شوی دی.
خیر الله،چې د اروزګان اوسېدونکی دی او کندهار ته د وخت تېرۍ لپاره تللی، داسې وایي:« دلته د وخت تېرۍ لپاره راغلم یم. د طالبانو حکومت لېدو ته راغلی یم،چې څنګه دی؟ موږ ترې ډېر خوشحاله یو. سیمه مو په امن کې شوله. سر او مال مو خوندي شو. غلاوې بندې شوې. ډېر خوشحاله یو. که پلار مې راته څلور وادونه کړي ول، دومره به نه وم، خوشاله شوی،لکه نن،چې خوشاله یم.»
د کندهار اوسېدونکی عزت الله وايي:« د الله فضل ده، تر اوسه پورې خو حالت ښه دی، ډز ډوز نه شته دی. په ښار خلک ټول خوشاله دي. طالبان له عامو خلکو سره ډېر ښه چلند کوي. تراوسه پورې چاته تکلیف نه نشته. له طالبانو مو یوه هېله دا ده،چې د چور او چپاول مخه ونیسي.»
اوس د کندهار ولایت بازارونه او سوداګريز مارکیټونه خلاص دی،خو بانکونه او دولتي ادارې لاهم تړلي دي.
د کندهار د نظم لپاره ګومارل شوي طالبان بیا وایي،د ژوند د عادي کېدو لپاره دې د کندهار اوسېدونکي له دوی سره لا زياته همکاري وکړي.
د کندهار نظم یو تن ساتونکی حکمت الله وايي:« د خوښۍ خبره دا ده، چې په ټول هېواد کې امارت قایم شو. د کندهار له وسله مو هېله دا ده،چې له موږ سره همکاري وکړي. که چېرې دوی له موږ سره همکار شي، موږ له دوی سره همکار یو.»
په کندهار کې د ژوند له عادي کېدو او جګړې له پایته رسېدو سره سم د دغه ولایت اوسېدونکي د خوراکي او غيرې خوراکي توکو د بېو د لوړېدو او ستر اقتصادي بحران د رامنځته کېدو وېره لري.