Skip to content
د ملګرو ملتونو د کډوالۍ نړیوالۍ ادارې استازې شابیه منټو افغانستان کې په روان حالت اندېښنه ښودلې او ټینګار یې کړی،چې څوک دې بهر ته له تګ په زور نه راګرځول کېږي.
منټو زیاته کړه:« اوس چې د افغانستان وضیعت ګونګ دی،د ملګرو ملتونو کډوالۍ خپلو هڅو ته دوام ورکوي او غوښتنه کوي،چې خلکو ته له افغانستانه د وتلو زمینه برابره شي او ټولو ملکیانو ته له کوم خنډ جوړلو پرته د سفر اجازه ورکړل شي.»
منټو وايي، افغانان تر بل هر وخت زموږ مرستو ته اړتیا لري، دوی د خوړو نه خوندېتوب او کوچنیانوکې خوارځواکي یې جدي ستونزه یاده کړې.
هغې زیاته کړه،نیم نفوس له وړاندې بشري مرستوته اړتیا لرله، چې وروستي اړو دوړ دغه شمیر لا زیاتوي.
هغه زیاتوي:«د روان زېږدیز کال له پیله د څلور میلیونه زیاتو ښځو او د لسو میلیونو ماشومانو په ګډون د افغانستان نیم نفوس له وړاندې بشري مرستو ته اړتیا لري. یو پر درېیمه برخه د خلکو خوړو نه خوندېتوب له ناورین سره مخ و. له پنځه کلنۍ کم عمره ماشومان بیا نیمایي له خوارځواکۍ کړېدل.»
د کډوالۍ نړیوالې ادارې له مرسته کوونکو غوښتي،چې خلکو ته بشري مرستې ورسوي او د خلکو ژوند وژغوري.
منټو وايي:« موږ پر مرسته کوونکو غږ کوو،چې بشردوستانه مرستو ته دوام ورکړي. پر وخت سره مرسته رسول د خلکو ژوند ژغوري، کړاو کموي او د نورو بې ځایه کیدو مخه نیسي. افغانستان کې د بشري مرستو لپاره یو اعشاریه دری میلیارده ډالرو ته اړتیا ده،چې د اړتیا وړ فنډ له منځه ۳۷ سلنه رسیدلې او اته سوه میلیونه ډالر کم دي.»
د کډوالۍ نړیوالې ادارې داسې مهال په زور له بهره د خلکو راګرځېدو مخنیوي غږ کړی،چې امریکا د پنج شنبې ناوخته وویل، چې تیرو ۲۴ ساعتونو کې یې دوه زره کسان خوندي ځای ته انتقال کړي.
له تیرو څو ورځو راهیسي ګڼ خلک د حامد کرزي نړیوال هوایي ډګر ټول شوي دي،چې ډېری یې هېڅ اسناد نه لري، خو بهر ته د تلوهڅه کوي. دغه موده کې د اخ و ډب او له طیارې څخه د لویدو پیښه کې یو شمیر کسان مړه شوي او ګڼ ټپیان دي.
