اخوا بیا په خواله رسنیو کې داسې مالومات خپاره شوي،چې امرالله صالح او احمد مسعود په دغه ولایت کې دي او د طالبانو پر وړاندې یې د مقاومت اعلان کړی او له خپلو خلکو یې غوښتي چې د دوی ترڅنګ ودریږي .
صالح پر خپله ټویټر پاڼه لیکلي،چې په پنجشیر کې دی او هېڅ کله به د طالبانو تر حاکمیت لاندې ژوند ونه کړي.
د پخواني قوماندان احمد شاه مسعود زوی احمد مسعود وايي:« په پنجشیر کې یم او د خپلو خلکو ترڅنګ او تر پایه به د خپلو خلکو تر څنګ پاتې شم.»
درې ورځي کېږي،چې طالبان پر کابل واکمن دي،خو د حکومت د رهبرۍ لپاره یې څوک نه دي ټاکلي، د دغې اندیښنې ترڅنګ سربیره پنجشیر ته د طالبانو نه ورتګ هم اندیښنې پیدا کړي دي.
د سیاسي چارو شنونکی عزیز معارج وايي:« په ټول افغانستان کې د یو پنجشیر پاتې کیدل او هلته د طالبانو نه تګ او د مسعود زوی او امرالله صالح د قوتونو پر جوړولو بوخت دي. اوس اندیښنه دا ده،چې طالبان به پرحکومتوالۍ بوخت وي او هغوی به په هېواد کې بیا ځلي جګړه پیدا کړي.»
خو ځینې پوځي کارپوهان بیا وايي، له ټول افغانستان سره یو ولایت جګړه نه شي کولای او په پنجشیر کې راټولې شوې دغه څیرې نه شي کولای،چې جګړه پراخه او ګډوډي رامنځ ته کړي .
د سیاسي چارو شنونکی حکمت الله حکمت وايي:« هغه اندیښنې،چې د جګړې او بیا مقامت په تړاو موجود دي،ډېر د باور وړ نه دي،ځکه ماتې ماتې ده او بریا بریا ده.هغه چا چې یو ځل ماتې خوړلې او د ولس له ملاتړه بې برخې شوی دی، بیا په یوازې پنجشیر باندې نه شي کولای،چې ټول افغانستان تهدید کړي لکه پخوا چې هم نه وو توانیدلي.»
که څه هم د طالبانو اسلامي امارت په دې تړاو په رسمي توګه څه نه دي ویلي،خو داسې ویل کېږي،چې هڅې روانې دي پنجشیر هم له جګړې پرته د امارت ترحاکمیت لاندې راشي.
