د امریکا دفاع او بهرنیو چارو وزارتونو په یوه ګډه خبرپاڼه کې ویلي، دوی د کابل نړیوال هوايي ډګر د خوندیتوب لپاره اقدامات کوي،ترڅو د امریکا او د نورو متحدانو پرسونل ته له افغانستانه د خوندي وتلو زمینه برابره شي.
د ګډې خبرپاڼه یوه برخه:« د امریکا او متحدانو پرسونل به په ملکي او پوځي الوتنو کې سر له ننه له افغانستانه وځي او دا لړۍ به څو ورځې دوام کوي.»
وروسته له هغې چې زرګونه طالبان کابل ښار ته دننه شول او د ښار ټولې برخې یې ونیولې،کابل ښاریانو پر هوايي ډګر هجوم ور وړ او د امریکايي ځواکونو سپيشل فورس الوتکې پورې نښتي ول،چې ګواکې بهر ته به یې انتقال کړي،خو ملکي وګړو ته هیڅ اجازه نه وه،چې پرمهال یې دوه تنو خپل ژوند دلاسه هم ورکړ.
دې وضعیت امریکايي چارواکي اندېښمن کړي او وېره یې ورسره پيدا کړې،چې هوايي ډګر کې د دوی میشتو اتباعو ته زیان ونه رسوي.
په خبرپاڼه کې وړاندې ویل شوي،په را روانو ۴۸ ساعتونو کې به په افغانستان کې د امریکايي پوځیانو شمېر نږدې ۶ زرو ته زیات شي،چې ماموریت به یې تر ډېره د دغو چارو پر اسانتیاوو متمرکز وي.