د پکتیا ځایي چارواکي وايي، روان کال په دې ولايت کې پر۲۰۹ پراختیايي پروژو کار روان دی او په پلي کېدو سره به یې ګڼې اسانتیاوې رامنځته شي.
د دوی په خبره، په يادو پروژو کې ۳۱ منځنۍ پروژې دي چې د دولت له بوديجې به پرې ۵۱۰ ميليونه افغانۍ ولګول شي او پاتې ۱۸۷ کوچنۍ پروژې دي چې د همکارو موسسو په مالي مرسته به پرې ۱۰ ميليونه امریکايي ډالر ولګول شي.
د پکتیا د اقتصاد رییس محمد یونس راشد وايي: « دا ټولې مهمې پروژې دي او تقریبا ً ۱۷۸ پروژې د موسسو او د ملګرو ملتونو د اړوند ادارو له خوا منظورې شوې دي چې په دې کې هم ډېرې بشپړې شوې او یوشمېر یې ترکار لاندې دي. په دغو پروژو شاوخوا ۱۰ میلیونه ډالره لګښت راځي چې ډېری یې انکشافي پروژې دي او بشري هم په کې شته.»
راشد وايي، د يادو پروژو له لارې شاوخوا ۲۰۰۰ کسانو ته د کار زمینه هم برابره شوې.
بل پلو ځایي اوسېدونکي وایي، اړتیا ده چې سرپرست حکومت د روانو رغنیزو پروژو چارې پر ټاکلي وخت پای ته ورسوي او د ورته نورو پروژو د پلي کولو له لارې د خلکو اساسي ستونزو ته رسېدنه وکړي.
د پکتیا یو تن اوسېدونکی وايي: « موږ ټول خوشاله یو، په کارونو کې هېڅ ستونزه نه شته او ډېر کسان په کې پر کارونو بوخت دي.»
د سیمې یو تن بل اوسېدونکی وايي: « د دغو پروژو بشپړېدو ته ډېره اړتیا ده، څرنګه چې ډېرې زیاتې پروژې په کار اچول شوې دي خو چې په سم ډول پلي شي او څارنه یې وشي.»
په پراختیايي پروژو کې یو تن کارکوونکی وايي: « ژمی را روان دی، په دې پروژو په کار کولو سره څه ناڅه پيسې لاس ته راځي او ډېرو خلکو ته د کار زمینه پيدا کېږي. له اسلامي امارت غوښتنه کوو چې لا ډېرې پروژې پيل کړي.»
همدارنګه ځايي چارواکي ډاډ ورکوي چې تر کار لاندې روغتیايي او بشر دوستانه پروژې چې په کې د پلې لارو جوړول، ویالې، سړکونه، روغتونونه او د ښوونځیو لپاره د ودانیو جوړول شامل دي، په پوره لوړ کيفيت بشپړې او ګټې اخيستنې ته وسپاري.
