د چاپېریال ساتنې ملي ادارې چارواکي وایي، د دې ادارې سرپرسست پرمشرۍ یو تخنیکي پلاوی د اقلیمي بدلون په کنفرانس کې د ګډون په موخه آذربایجان ته تللی.
دوی په ياد اقلیمي کنفرانس کې د افغانستان پلاوي ګډون ښه فرصت بولي او زیاتوي چې پلاوی يې په پوره چمتووالي سره په کنفرانس کې برخه اخلي.
د چاپېریال ساتنې ملي ادارې سرپرست مطیع الحق خالص په دې اړه وايي: « د نومبر له یوولسمې تر دوه ویشتمې پورې، په آزربایجان کې د اقلیمي بدلون ۲۹ نړیوال کنفرانس دی. د اسلامي امارت له راتګ راهیسې دا لومړی ځل دی چې موږ دغه ډول یوه کنفرانس ته غوښتل کېږو. موږ به کوشش وکړو په دې کنفرانس کې د افغانستان هغه زیانونه او ستونزې له نړیوالو سره په مختلفو فورمونو کې شریکې کړو چې د اقلیم د بدلون له امله ور اوښتي. دا زموږ لپاره یو فرصت دی چې خپلو اړیکو ته پراختیا ورکړو.»
د اسلامي امارت مرستیال ویاند حمد الله فطرت هم په یاد کنفرانس کې د افغان پلاوي ګډون یو ښه فرصت بولي او زیاتوي، پلاوی به له اقلیمي بدلونونو سره د مبارزې په تړاو د افغانستان غوښتنې له نړۍ سره شریکې کړي.
فطرت زیاتوي: « د اسلامي امارت له بریا وروسته دا لومړی ځل دی چې په دې کچه یو پلاوی د اقلیمي بدلون په نړیوال کنفرانس کې ګډون کوي. دا د افغانستان لپاره یو ښه فرصت دی؛ ځکه چې افغانستان له اقلیمي بدلون زیانمن او آسیب پذیر هېواد دی. دغه پلاوی به وکولی شي د افغانستان د اقلیمي بدلونونو او دغه راز د چاپېریال په برخه کې له نړیوالو سره د همکاریو د پیاوړتیا او په دې برخه کې نړیوالو مالي مکانیزمونو ته د افغانستان د لاسرسي او د دې ترڅنګ له اقلیمي تغییراتو سره د مبارزې په برخه کې د افغانستان غوښتنې شریکې کړي.»
د ملګرو ملتونو د اقلیمي بدلون نړیوال کنفرانس نن د نومبر پر ۱۱ مه د ازربایجان په پلازمېنه باکو کې پيلیږي.
ټاکل شوې، دغه نړیوال کنفرانس د نومبر تر ۲۲ نېټې ادامه ولري او په کې د اقليمي بدلون د ناوړه پايلو، اغېزو او د مخنیوي لارو چارو په تړاو بحثونه وشي.
