Skip to content
د سور صلیب نړیواله کمېټه وايي، په تیرو لسو ورځو کې د جګړو له امله څه باندې څلور زره ملکي ټپيان راوړل شي او درملنه یې شوې ده.
یاده کمېټه وايي، دا د تاوتریخوالي د زیاتوالي ثبوت ښوونه کوي او د جګړې له ښکېلو اړخونو د تاوتریخوالي کموالي او د روغتونونو خوندي ساتلو غوښتنه کوو.
د سور صلیب نړیواله کمېټه:« د اګسټ له لومړۍ نیټې څخه په هغو ۱۵مرکزونو کې، چې سور صلیب ورسره مرسته کوي، ۴۰۴۲ تنه چې په وسله ټپیان شوي، درملنه یې شوې ده. دا موضوع د تاوتریخوالي شدت ښیې.»
سور صلیب وایي، جګړې زرګونه کورنۍ د خپلو مینو پرېښودو ته اړې کړي او ټینګار یې کړی،چې دا وضعیت باید پای ومومي.
د سور صلیب نړیواله کمېټه:« موږ ګورو، چې کورونه ویجاړیږي، روغتیایي کارکوونکي او ناروغان په خطر کې دي، روغتونونه او د اوبو او برېښنا تاسیسات زیانمن کېږي، په ښارونو کې د وسلو کارونه، له اصلي موخو وراخوا پر ملکیانو بد اغیز لري، ډېری کورنۍ، خوندي ځایونو ته له تیښتې پرته بله هېڅ لاره نه لري. دا وضعیت باید پای ته ورسیږي.»
سور صلیب نړیوالې کمېټې په ګڼ میشتو سیمو کې د ملکیانو خوندېتوب په موخه د جګړې پر مخنیوي ټینګار کړی دی.
یاده کمېته زیاتوي، دوی او سرې میاشتې ټولنې یوازې په جولای میاشت کې د جګړې ۱۳۰۰ ټپیانو سره مرسته کړې او د روغتیایي مرکزونو، کارکوونکو او امبولانسونو په خوندیتوب یې ټینګار کړی دی.
سور صلیب دغه راز غوښتنه کړې، چې دوی، سره میاشت او نورو بشري بنسټونو ته دې اجازه ورکړل شي، چې ټپیان ولېږدوي او اړمنو ته بېړنۍ مرستې چمتو کړي.
