د افغان پُست دولتي شرکت له لوري په کابل کې د پاسپورټونو د وېش نوې څانګه او د پېرېدونکو خدمتونو لپاره د اړیکو نیولو مرکز پرانیست.
د مخابراتو او مالوماتي ټکنالوجۍ وزارت سرپرست د یاد شرکت له لوري په بېلابېلو برخو کې د وړاندې کېدونکو خدمتونو له امله خوښي څرګندوي او خلکو ته په ټولو برخو کې د لا زياتو اسانتياوو پر برابرولو ټينګار کوي.
نجیب الله حقاني په دولتي چوکاټ کې ډیجیټلي حکومتولي د پرمختګ اصل بولي او ډاډ ورکوي چې د همدې اصل له مخې به ټول هېواد ته په متوازن ډول مخابراتي خدمات ورسول شي.
حقاني زیاتوي: « نن چې دغو وروڼو دا ابتکار کړی دی او دا آبادي یې کړې، د دې لپاره دي چې هېوادوال په اسانۍ سره وکولی شي پاسپورټ ترلاسه کړي. موږ د دوی د دغو هڅو قدرداني کوو. انساني کړنه چې څومره په یوه شي کې دخیله وي، هلته د عدالت مخنیوی کېدای شي. خو که کله د سیسټم په حیث سړی مخته ځي، ښايي د عدالت تأمین په کې زیات وي.»
د افغان پُسټ دولتي شرکت په دې څانګه کې به د نورو خدمتونو ترڅنګ، هغه کسان چې پاسپورټونه او یا هم لېږل شوي توکي یې په ځنډ تر ټاکلو هدفونو رسېږي، د پېرودونکو خدمتونو د څانګې له ۱۹۹ شمېرې سره د اړیکې له لارې مالومات هم ترلاسه کوي.
د یاد دولتي شرکت او پاسپورټ ریاست مسوولین وایي، هڅه کوي په ټول هېواد کې پاسپورټ، شهادتنامو او نورو اسنادو ته لاسرسی اسانه کړي؛ ترڅو د لرې ولایتونو کسان دې ته اړ نه شي چې تر مرکز پورې راشي.
د افغان پُست دولتي شرکت رییس رحمتالله مکي وايي: « ځېنو ملګرو، ځېنو هېوادوالو ته دا ستونزه وه چې هلته مرکزي پُسته خانې ته راشي. په پُسته خانې کې بیا کله رش وي، تکلیف ورته وي، ګڼه ګوڼه زیاته وي؛ نو د هغې د سهولت لپاره مو څه وکړل، په پل محمود خان کې مو یوه نوې پُست خونه جوړه کړه. له دې وروسته به د پاسپورټ کومه توزېع چې په مرکز کې کېدله، هغه به په پل محمود خان کې کېږي.»
د پاسپورټ رییس مولوي عبدالکریم حسیب وايي: « الحمدالله څه باندې دوو کالو کې چې زه د پاسپورټ ریاست ته تللی یم، له هېڅ ولایت نه داسې شکایت موږ ته نه دی راغلی چې د دوی پاسپورټ د د افغان پُسټ له لارې دوی ته رسېدلی وي او بیا د دوی ته ستونزه جوړه شوې وي. دوی د ګرانو هېوادوالو لپاره یوه داسې نوې پُسته خانه جوړه کړه چې دلته د ژوند ټول ضرورتونه ورسره په نظر کې نیول شوي دي.»
بله خوا، ځينې نور چارواکي وایي، سرپرست حکومت د خدماتو وړاندې کولو، اقتصادي ځان بسیاینې، په بازار کې د سالم رقابت او مسلکي کسانو ته د کار زمینې په برابرولو کې مهم رول لوبولی او په خبره یې هڅه کېږي چې د سیاسي خپلواکۍ ترڅنګ اقتصادي خپلواکي هم ترلاسه شي.
د دولتي شرکتو د رهبري پلاوي ریيس احمد جان بلال وايي: « لکه څرنګه مو چې سیاسي خپلواکي ترلاسه کړې ده، موږ وکولی شو په اقتصادي برخه کې هم هېواد مستقل کړو او اقتصادي استقلال هم ترلاسه شي. په دې ډول به موږ وکولی شو چې په نړۍ کې د یوه سیال هېواد په توګه ژوند وکړو او خپل مقام ترلاسه کړو. د شرکتونو په فعالیتونو سره اساسي موخه زموږ دا ده چې هېوادوالو ته معیاري خدمتونه وړاندې شي، د هېوادوالو ستونزې راکمې شي او له دوی سره په بېلابېلو برخو کې همکاري وکولی شو.»
د بهرنیو چارو وزارت مسوولین هم د تحصیلي او نورو اسنادو د تایيد په برخه کې د افغان پُست شرکت هڅې ستايي او په خبره یې، اوس مهال په کابل کې د اسنادو د تصدیق لپاره دوې پُسته خانې شته چې يوه يې مرکزي او بله په دشت برچي کې ده.
