کابل کې د تخنیکي او مسلکي زده کړو ادارې له لوري د روښان زړو مسلکي انسټېټیوټ له لوري د(روښان زړو د وړتیاوو پوهاوي او له هغوی ملاتړ) تر نامه لاندې غونډه ترسره شوه.
په دې غونډه کې د بېلابېلو وزارتونو چارواکو ګډون درلود.
د تخنیکي او مسلکي زده کړو ادارې سرپرست په دې انسټېټېوټ کې د نابینایانو او کڼو وګړو د ظرفیت ستاینې ترڅنګ وايي، دا مهال په هېواد کې ۴۵ زره نابینا او کاڼه له حرفوي زده کړو بې برخې دي.
د غلام حیدر شهامت په خبره، په پام کې ده چې د نورو وزارتونو او موسسو په همکارۍ د دې کسانو لپاره په هغو برخو کې د حرفوي زده کړو زمینه برابره شي چې د هېواد پر کچه ورته اړتیا ده.
شهامت زیاتوي:« د شمېرو له مخې، په افغانستان کې شاوخوا ۴۵ زره نابینا او یا کم بینا کسان شته دي. ډېری دغه کسان د علم او مسلک زده کولو له امکاناتو محروم دي. نو له همدې امله، د تخنیکي او مسلکي زده کړو اداره نیت او بشپړه اراده لري چې د مختلفو بنسټونو په همکارۍ او د نړیوالو ظرفیتونو په کارولو سره داسې شرایط چمتو کړي چې دغه کسان وکولی شي په خپلواکه او ګټوره توګه په ټولنه کې فعالیت وکړي.»
ورته مهال، د شهیدانو او معلولینو چارو وزارت چارواکي وایي، سرپرست حکومت معلولینو ته د رسېدنې په برخه کې د تعادل په پام کې نيولو سره هغو کسانو ته هم میاشتني مالي امتيازات ورکوي چې په تېر نظام کې د جګړې پرمهال معلول شوي دي.
دوی زیاتوي، اوس مهال ۱۹۰ زره معلولينو ته میاشتنی معاش ورکوي او په خبره یې، ژمن دي چې په بېلابېلو ادارو کې کاري فرصتونه هم ورته برابر کړي.
د شهیدانو او معلولینو چارو وزارت معین عبدالحکیم حقاني وايي: « سره له دې چې نړۍ او افغانان ټول وايي چې امارت اقتصادي مشکلات لري، خو بیا هم څه کم ۲۰۰ زره معیوبینو ته د اسلامي امارت د شهیدانو او معلولینو چارو وزارت میاشتنۍ تنخوا ورکوي. دا معیوبین هغه مهال زموږ دوښمنان وو، ځکه زموږ له لاسه دوی په سترګو باندې معیوب شول، پر پښو باندې فلج شول، په غوږونو باندې کاڼه شول، په لاسونو باندې ګوډ شول؛ ځکه چې موږ سره مقابل کې وو. نن چې اسلامي نظام راغی، هماغه معیوب چې زموږ له لاسه معیوب شوی دی، هغه ته دا نظام پیسې ورکوي.»
بله خوا، د نابینایانو د کورنیو غړي غوښتنه کوي چې د نورو هېوادونو په څېر دې نابیناوو ته د ټرانسپورټ او روغتيايي خدمتونو ترڅنګ نورو برخو کې هم اړینې اسانتیاوې برابرې شي؛ ترڅو دغه کسان زده کړو ته په پوره ډاډ لاسرسی پیدا کړي.
د معلولینو یو تن استازی خان زرک ځدراڼ وايي: « د نابینایانو په برخه کې چې په نورو هېوادونو کې کوم سهولتونه شته، لکه د دوی اجتماعي ژوند ته، په ټولنیزو چارو کې که یو نابینا له دې مکتب څخه رخصتېږي او وځي، دولت باید حتا د پياده رو په جوړولو کې د نابیناوو حق او حقوق په نظر کې ونیسي. په نورو هېوادونو کې حتا په پياده رونو کې نابینایانو ته خاصې لیکې اچول شوې وي.»
دا په داسې حال کې ده چې د روښان زړو انسټېټیوټ مسوولین وایي، اوسمهال ۳۲۰ تنه زده کوونکي او محصلین لري چې په درېيو(اسلامي تعلیمات، عمومي تعلیمات او حرفه او مسلک) څانګو کې زده کړې کوي او د ټرانسپورټ په برخه کې اړینې اسانتیاوې لري.
د روښان زړو انسټېټیوټ آمر نورمحمد فیضي وايي: «علاوه له دې چې مرکز د ټرانسپورټ ستونزه درلوده، واقعا ً چې زموږ مرکز د ټرانسپورټ نه شتون له امله جدي ستونزې سره مخ و. د تخنیکي او مسلکي زده کړو ادارې د ونډې پر بنسټ مو سږ کال تر ټولو غوره ټرانسپورټ درلود او اوسمهال۱۰ عرادې کاسټر موټر عملا ً فعالیت لري، زده کوونکي سهار راوړي او غرمه یې خپلو کورونو ته رسوي.»
په دې انسټېټیوټ کې له زده کړو سره هم مهاله، د ډېری هغو کسانو لپاره د سواد زده کړې فرصت هم برابر شوی چې عمر یې لوړ وي.
د انسټېټیوټ د مالوماتو له مخې، اوس مهال د سواد زده کړې په برخه کې۳۰ تنه زده کوونکي لري.
