د اېمرجينګ کرېکت لوبډلو آسیا جام سیالۍ د افغانستان، هند، پاکستان، سريلانکا، عمان، هانکاګ، بنګله دېش او عربي متحده اماراتو ترمنځ تېره اوونۍ پیل شوې.
د دغو لوبو په دوام، د افغانستان الف لوبډله چې د افغان ابدالیانو په نوم یادېږي، په خپلو ګروپي لوبو کې د سریلانکا او بنګله دیش الف لوبډلو ته په ماتې ورکولو سره نیمه پایلوبې کې له هند سره مخامخ شوه.
دغه نیمه پایلوبه چې د جمعې پر شپه ترسره شوه، افغان ابدالیانو وکولی شول د هند الف لوبډلې پر وړاندې په خپله توپوهنه کې د څلورو لوبغاړو په سوځېدو سره په ټاکل شویو ۲۰ اورونو کې د ۲۰۷منډو هدف وټاکي.
د لوبې په دويمه پاڼۍ کې د هند الف لوبډلې د ۲۰ اورونو په لوبولو او د ۷ لوبغاړو په سوځېدو سره ۱۸۶ منډې جوړې کړې او د افغان ابدالیانو له خوا ټاکل شوی هدف پوره نه کړای شو.
د افغان ابدالیانو لوبډلې لوبغاړي خوښ دي چې په دغو سیالو کې یې هند لوبدلې ته ماتې ورکړه او پایلوبې ته یې لار ومونده.
د افغان ابدالیانو لوبډلمشر دروېش رسولي وايي: « ډېره ښه لوبه وه، ټولو افغانانو ته دې مبارکه وي، ډېره غټه لوبه وه، نیمه پایلوبه له هند سره وه. همداراز دغه لوبغاړي او دغه ټیم تاسو په دعاګانو دې ځای ته رسېدلي چې نیمه پایلوبه مو وګټله، یوه بله لوبه موږ ته پاتې ده. انشاالله په دعاګانو کې مو یاد ساتیئ چې دغه بله لوبه هم وګټو، د کوم هدف لپاره چې راغلي یو، هغه ترلاسه کړو.»
له دې سره، د افغان ابدالیانو لوبډلې یو شمېر نور لوبغاړي وایي، راتلونکې پایلوبه کې به په پوره مورال د سریلانکا لوبدلې پر وړاندې د لوبې ډګر ته ښکته کېږي.
د افغان ابدالیان لوبډلې توپ وهونکی صدیقالله اتل وايي: « له بېګانۍ لوبې وروسته خو ماشالله ټولو لوبغاړي زیات باور کې دي چې انشاالله سبا چې موږ له سریلانکا سره کومه پایلوبه ده، هغه به په ډېر ښه شان باندې کوو.»
د کرېکټ بورډ مسوولین د افغان ابدلیانو وروستۍ لوبې د ستاينې ترڅنګ له لاسته راوړنو ډکې ګڼي او زیاتوي چې د سریلانکا لوبدلې پر وړاندې د پايلوبې کولو لپاره بشپړ چمتووالی لري.
د کرېکټ بورډ ویاند سید نسیم سادات وايي: « انشاالله اوس لوبډله په پای لوبه کې ده، زموږ موخه هم همدا ده چې موږ دغه جام که خدای کول افغانستان ته راوړو. د هېوادوالو به مو هم هیله همدا وي چې دوی خپل لوبغاړي او خپل ابدالیان په دعاوو کې یاد وساتي او هغوی به هم انشاالله زحمت وباسي او کوشش به کوي چې پای لوبه هم یوه ښه پای لوبه ترسره کړي د سریلانکا الف لوبډلې پر وړاندې او بالاخره دغه جام خپل ګران هېواد ته راوړي.»
په ورته مهال، د افغان ابدالیانو لوبډلې روزونکي هیله من دي چې افغان ابدالیانو لوبډله به راتلونکې پای لوبه کې د سریلانکا لوبډلې پر وړاندې ښه وځلېږي.
د افغان ابدالیانو مشر روزونکی نوروز منګل وايي: « انشاالله هېله لرو چې سبا ماښام په همدې جذبې سره او همدې مورال سره میدان ته ښکته شو، ترڅو په فاینل کې ښه لوبه وکړو او دغه کوم د اېمرجینګ کپ دی دا د افغانستان په نوم کړو.»
د کرېکټ شنونکي د هند الف لوبډلې پر وړاندې د افغان ابدالیانو بریا تاریخي بولي او وايي، دا د دې ښکارندويي کوي چې د افغانستان کورنی کرېکټ د ودې په حال دی او هیله من دي چې پایلوبه د افغان ابدالیانو لوبډلې په بریا تمامه شي.
د کرېکټ شنونکی شهزاده مسعود وايي: «دا د دې یوه ډېره ښه ښکاره نمونه ده چې زموږ داخلي کرېکټ او بیا خصوصا ً دغه نوي ځوانان ډېر ښه رشد یې کړی الحمدالله. زه امید کوم چې په راتلونکې کې د سریلانکا سره چې سبا پایلوبه ده، هم دغسې وځلېږي لکه څنګه چې د هند پر وړاندې دوی ښه وځلېدل.»
د کرېکټ شنونکی باطن شاه عبدالرحیمزی وايي: «ډېر زیات ورته خوشاله یم. هغه زموږ فیلډېنګ چې به بېګانۍ لوبه کې ډېر زیات او ټسټنډېنګ و. نو په دې هیله چې په پایلوبه کې افغان ابدالیان ښه وځلېږي او زموږ دا د بریا چانس هم انشاالله شته.»
افغان ابدالیانو له هند سره د نیمه پایلوبې د توپ وهنې په برخه کې صدیق الله اتل ۸۳، زبیر۶۴ او کریم جنت ۴۱ منډې جوړې کړې.
د توپ اچونې په برخه کې الله محمد غضنفر، عبدالرحمن رحماني، شرف الدین اشرف ښه وځلیدل.
ټاکل شوې د اېمرجنګ کرېکټ لوبډلو آسیا جام سیالیو پایلوبه نن یکشنبه ماښام د افغانستان او سریلانکا ترمنځ ترسره شي.
