په هرات ښار کې پرون شبنه د« ۱۴۰۰ کال د زمري پر ۱۶ مه» د لوېدیځ زون لسګونه علماء او قومي مشران د جګړې پر ضد او د سولې پر ملاتړ راټول شوي وو او پر طالبانو یې غږ وکړ،چې نوره
جګړه ودروئ او اوربند وکړئ.
دیني عالمانو د افغان جګړې اصلي موخه افغان وژنه یاده کړه او ژر تر ژره یې د درېدو غوښتنه وکړه.
مولوي خدایداد صالح وايي:« موږ د جګړې له ښکېلو اړخونو، په بې پرې توګه، په عذر او د خواهیش په ډول غواړو،چې روان حالت ته د پای ټکی کېږي او اوربند ورکړي.»
دغه دیني عالمان وايي، که چېرې طالبان او حکومت د دوی غوښتنه ومني،هرات کې به دواړو لورو ته منلی یو ګډ کمېسیون جوړ کړي.
قومي مشران وايي، افغانان نور له جګړې ستړي دياو دواړه خواوې باید د خبرو له لارې خپلي غوښتنې مطرح کړي.
یو بل تن قومي مشر وايي:« خلک غواړي،چې جګړه ونه شي،ځکه جګړه د حل لاره نه ده. شااوخوا ۴۲ کاله کېږي،چې په افغانستان کې جګړه روانه ده،خو پایله یې نه ده ورکړې.»
قومي مخور او دیني علماء وايې،دوی د هېڅ لوري پلوي نه کوي او خپلو هڅو ته به دوام ورکوي، ترڅو اوربند ته لاره پرانېستل شي.
اخوا بیا په هرات کې له تېرو ۷۲ ساعتونه وضعیت څه نا څه آرام و او د جګړې کوم راپور نه دی ورکول شوی.
د هرات ملي امنیت مشر حسیب صدیقي وايي:« له ۳۰۰ تر ۳۵۰ پورې وسله ال،چې ډېری له هرات نه ول او ان له هېواد بهر وسله وال په کې شامل ول، هغوی په دې جګړه کې وژل شوي دي.»
