د ډیورنډ فرضي کرښې ها خوا د  پښتنو ملي جرګه: ګډونوالو پاکستان یو ځل بیا د طالبانو پر ملاتړ تورن کړ

د ډیورنډ فرضي کرښې ها خواد  شبنې په ورځ د « ۱۴۰۰ کال د زمري پر ۱۶ مه »  د پېښور ښار چارسده کې د ګروندګرو ګوند پر کوربتوب د پاچاخان مرکز کې د پښتنو ملي جرګه ترسره شوه. 

یاده  جرګه کې،چې د الله اکبر او لر او بر په سرلیک سره جوړه شوې، د کوزې پښتونخوا ګڼو مخورو مشرانو او سیاستوالو په کې ګډون کړی وو. 

جرګه کې د افغانستان پر روان وضعیت اندېښنه څرګنده شوه او ویل شوي،چې د دې وضعیت دوام ددواړو خواوو پښتنو ژوند او راتلونکې ننګولی شي.

پښتون سیاستوال ایمل ولي خان وايي: « جنګ د محمد اشرف غني او طالب نه دی. جنګ د پښتنې خاورې د خودمختارۍ او د پښتنې خاورې د غلامۍ دی. زه ولې پر امریکا نیوکه وکړم.» 

د پښتون ژغورنې غورځنګ مشر  منظور احمد پښتین په دې جرګه کې له علماوو غوښتنه وکړه،چې د پښتون ملت غږ دې بدرګه کړي.

 پښتین ویلي، پاکستاني علماء د پاکستان لپاره جمهوريت غواړي او افغانستان کې بیا د جمهوريت ستنې ړنګوي.

له کرښیې هاخوا پښتانه سياستوال د پاکستان  حکومت د طالبانو متحد او ملاتړی بولي او وايي ليدلي دي،چې د دوی په سيمو کې طالبان تربيه او بيا افغانستان ته د جګړې لپاره لېږل کېږي.

پښتون سياستوال ايمل ولي خان وايي:« هغه مداخله داسې مداخله ده،چې په زرګونه وسله وال له کرښیې تېږي. افغانستان کې یې د جهاد په نوم پر افغان ولس اور بل کړی دی. دلته پاکستان ته هره ورځ د وسله والو تابوتونه راروان دي. د پاکستان بېرغ کې ورته سلامي کېږي. جنازه یې کېږي او بیا دفن کېږي. » 

دا جرګه د الله اکبر لر او بر امن په نوم ترسره شوه،چې په يو شمېر مهمو موضوعاتو په کې خبرې وشوې. د پښتون ژغورنې غورځنګ مشر منظور احمد پښتین نیوکه کړې،چې پر نړیوالو او پاکستاني رسنیو کې د وسله ‌والو مرکې خپرېږي،خو زموږ سوله یيزه چېغه نړيوالو او پاکستاني رسنيو بدرګه نه کړه.