پر جوزجان، هرات، هلمند او کندهار ښارونو د طالبانو له ډله ییزو بریدونو وروسته د امریکا ولسمشر جوبایډن پوځ ته امر کړی، چې د طالبانو مورچلې په بي ۵۲ الوتکو په نښه کړي.
د برېټانیا ډیلي مېل ورځپاڼې راپور ورکړی، چې بایډن د طالبانو لاس ته د لویو ښارونو د لوېدو مخنیوي په موخه دا حکم صادر کړی دی.
یاد خبري ویبسایټ د ځینو امریکایي سرچینو له قوله دا هم ویلي، چې یادو الوتکو په دې وروستیو کې په هرات، لښکرګاه او کندهار ښارونو کې پر طالبانو هوايي بریدونه کړي دي.
د ډیلې مېل د راپور له مخې، جو بایډن د امریکا بي-۵۲ او نورو پرمختللو الوتکو ته امر کړی، چې په افغانستان کې هغه طالب وسله وال په نښه کړي، چې پر لویو ښارونو د بریدونو پلان لري.
طالبانو تر دې دمه نیمروز، جوزجان او کندز ښارونه نیولي دي.
کندهار، هلمند او هرات بیا هغه درې نور ولایتونه دي، چې د مرکزونو نیولو لپاره یې د افغان ځواکونو او طالبانو ترمنځ جګړې روانې دي.
امریکايي رسنیو خبر ورکړی، چې د طالبانو په شاه تمبولو لپاره ښايي د امریکا هوايي ځواک بي دوه پنځوس او ای سي ۱۳۰ ډوله الوتکې وکار وي.
امریکايي ولسمشر داسې مهال پر طالبانو د بي دوه پنځوس بم غورځونکو الوتکو د بریدونو بیا پیلولو امر کوي، چې طالبانو په شمال او سویل کې پر لویو ښارونو ډله ییز بریدونه وکړل.