پرون شپه هرات ښاريان لارو او کوڅو ته وتلي ول او د الله اکبر پر نعرو سره يې د افغان ځواکونو ننګه کوله.
دوی وايي، د الله اکبر له نعرو سره یې د وېرې سکوت مات کړ او افغان ځواکونو د خلکو له نعرو سره مورال واخېست.
دوی زیاتوي، زړو او ځوانانو د الله اکبر په وېلو سره له افغان ځواکونو سره خواخوږي او له جنګه کرکه وښوده.
افغان ولسمشر محمد اشرف غني وايي: «طالب دې پوه شي چې دا خاوره تل په الله اکبر درېدلې، الله اکبر دوی ته څوک نه ورکوي. د دوی کار فتنه، فساد او وژنه ده.»
یو شمېر ښوونکي وايي، په افغانانو تل خپلې ليکې او صفونه پر همدې نعره منظمې کړي او مقابل لوري ته يې د يووالي قوت ښودلی دی.
یو تن ښوونکی وايي: «افغانانو همېشه په همدې نعره لوی لوی قدرتونه مات کړي دي.»
ښوونکی: «د الله اکبر نعره زياته مهمه ده، چې خلک خبر شي، پاڅېږي او يو غږ پورته کړي، ترڅو له دې وضعيت خلاص شو.»
په نورو ولايتونو کې هم د شپې له خوا په يو غږ د الله اکبر نعرو پورته کېدو ویل شوي او فعالانو په خواله رسنيو کې فعاليت پېل کړی دی.
د ولسي جرګې مشر مير رحمان رحماني وايي: «له خاورې ساتنه لوی اجر او سعادت لري. د هرات په مبارزينو زرځله درود چې د الله اکبر نعرې په ويلو سره يې دا خنجر د دښمن په زړه کې ننويست.»
د مشرانو جرګې مشر فضل هادي مسلميار وايي: «د هرات مجاهدو او غيورو ولسونو بيګاه شپه د ملي امنيتي ځواکونو پر ملاتړ د الله اکبر خوږې نعرې زمزمه کړې. زه د هراتيانو دغه وياړلی او تاريخي ګام ستايم.»
په خواله رسنيو کې نږدې هره ليکنه کې الله اکبر ليکل شوی او يادونه شوې، چې نورو ولايتونو کې به دا ټول پاڅون کوي.
د کابل ښار یو تن اوسېدونکی وايي: «د تکبير هدف دا دی، چې له دې وضعيت خلاص شو او بايد يو لاس شوو.»
د کابل ښار اوسېدونکی: «اوسنی وضعيت د بې اتفاقۍ له کبله راغلی دی، ترڅو چې پراتفاق نه شو، له دې وضعيت نه شو وتلی.»
د الله اکبر شعار لپاره خواله رسنيو کې ويډیوګانې هم جوړې شوي او دا پاڅون د افغان ځواکونو او روانه جګړه کې د یو منظم صف د يووالي لپاره مهم ياد شوي.