Skip to content
په کابل کې د خصوصي ښوونځيو له پيل کېدو سره سم یو شمېر زده کوونکي وايي، د کرنتین پر مهال یې درس نه دی لوستی،خو د ښووځنیو ادارې ترې د کرنتین مودې فیس غواړي.
مدثر د خصوصي ښوونځي یو تن زده کوونکی دی، هغه وايي:« موږ د رخصتیو پر مهال درس نه دی ویلی،خو ښوونځي کې رانه فیس غواړي.»
رڼا مومند یوه بله د خصوصي ښوونځي زده کوونکې ده، هغه هم وايي، په ښوونځي کې ترې د کرنتین وخت فیس غوښتل کېږي.
هغې زیاته کړه:«کورونايي حالت کې ښوونځي رخصت شوي ول،درس مو ونه لوست. له موږ د ښوونځي اداره فیس غواړي،خو دا د دوی حق نه کېږي.»
شااوخوا دوه میاشتې وړاندې د کورونا وبا د مخنیوي په موخه د روغتیا وزارت له لوري د ښوونځیو او پوهنتونونو د تړل کېدو پرېکړه وشوه،چې ډېری زده کوونکي او محصلین یې له زده کړو پاتې کړل، چې شااوخوا شپږ نیم لکه یې د خصوصي ښوونځیو زده کوونکي دي.
اخوا د پوهنې وزارت بیا پرېکړه کړې،چې د خصوصي ښوونځیو زده کوونکي دې د ښوونځي ادارې ته یوازې ۵۰ سلنه فیس ورکړي.
د پوهني وزارت د ښوونې او روزنې مرستیال عطا الله واحدیار وايي:« د افغانستان خصوصي ښوونځي د سرطان یا چنګاش میاشتې فیس ۵۰ سلنه اخلي. ۵۰ سلنه فیس د خصوصي ښوونځیو له خوا تخفیف دی او ۵۰ سلنه د زده کوونکو ولادین ورکوي.»
د خصوصي ښوونځیو ټولنې مسولینو بیا د خصوصي ښوونځیو د ښوونکو د معاشونو پر ورکړې هم ټینګار وکړ،چې د کرنتین مودي معاشونه به ښوونکو ته ورکول کېږي.
د کورونا وبا اغېز د هېواد پر ټولو سکتورونو منفي اغیز کړی دی،چې د خلکو اقتصاد یې هم اغیزمن کړی دی.
