Skip to content
د افغان حکومت مذاکراتي ټیم مشر محمد معصوم ستانکزي نن « یکشبنه د زمري پر ۱۰مه» کابل کې د دیني علماوو ناسته کې د وینا پر مهال وویل، د سېمې هېوادونه د افغان سولې پروسه کې لاسوهنه کوي او پر وړاندې یې خنډونه جوړوي.
ستانکزی زیاتوي:« د سولې په پروسې کې د دواړو خواو اراده نه شته، یوازې موږ ورته اراده لرو او د سولې په پروسه کې د سېمې هېوادونه هم لاسوهنه کوي. افغانستان وضعیت ډیر پيچلی شوی دی.»
هغه په خپلو خبرو کې وویل، طالبان لویې غوښتنې لري چې د شل کلن حکومت لاسته راوړنې له لاسه وځي.
په ورته وخت کې هغه وايي، په دوحه کې خبرې د اساسي قانون او ګډ حکومت بحث ته رسېدلي وې، چې ودرېدې.
ستانکزی وايي:« خبرې دوې اساسي موضوعګانې ته رسېدلي، د اساسي قانون پر سر او بل هم د ګډ او مشترک نظام پر سر.»
د ستانکزي په خبره، که طالبان سیاسي اراده ولري، سوله ممکن ده، خو هغه خبرداری ورکړ چې افغانانو ته انحصار د منلو نه دی.
ستانکزي زیاته کړه: «که اساسي اراده شتون ولري، نو سوله ډېر ژر ممکنه ده، خو باید انحصار شتون ونه لري، ځکه افغانانو ته د منلو وړ نه دی.»
که څه هم دواړو لوریو کله کله افغانانو ته د سولې هیله بښوونکي خبري کوي، خو په عمل کې دا مهال د هېواد په ډېریو ولایتونو کې جګړې زور اخېستی، لسګونه ملکي کسانو ته مرګ ژوبله اوښتې او لسګونه زره کورنۍ له خپلو مېنو بي ځایه شوي دي.
