Skip to content
د افغانستان امنیتي او دفاعي سکتور ویاند نن « یکشبنه د زمري پر ۱۰ مه» کابل کې د یوه خبري کنفرانس پر مهال وویل، افغان ځواکونو په تېره یوه اوونۍ کې له ۲۰۰ زیات هوايي او ځمکني عملیات کړي،چې په پایله کې یې له ۱۳ سوو زیات طالبان وژل شوي، شااوخوا ۸ سوه یې ټپیان دي او همداراز له ۱۰۰ زیات یې ژوندي نیول شوي دي.
شینواري زیاته کړه:« په تېره یوه اوونۍ کې له ۲۲۰ زیات عملیات شوي،چې په پایله کې یې ۱۳ سوه ۲۳ طالبان وژل شوي،چې کلیدي غړي یې په کې شامل دي، ۷ سوه ۷۰ یې ټپیان دي او ۱۳۲ نور یې ژوندي نیول شوي دي.»
سره له دومره تلفاتو بیا هم طالبانو خپلو جګړو ته زور ورکړی او کندهار هلمند او هرات ولایتونو کې یې سختې جګړې پیل کړي،چې ځینې سیمې یې نیولي هم دي.
طالبان وايي، د ښار ځینې سیمې نیولي او لاهم د پرمختګ په حال کې دي او لښکرګاه کې یې هم اوومه حوزه نیولې او پردویمې بریدونه یې پیل کړي دي.
د طالبانو ویاند ذبیح الله مجاهد وايي:« زموږ جنګیالي د هرات په ښار او نږدې سیمو کې یې حضور لري او د دغه ولایت د پل مالان سیمه مو نیولې ده، په هلمند کې ۷ حوزه نیول شوي، پر دویمې حوزې جګړه روانه ده او د کندهار د هوايي ډګر د رن وې په له منځه وړلو سره د هوايي بریدونه مخه نیول شوې.»
افغان ځواکونه مني،چې په دغو ولایتونو کې امنیتي وضیعت ښه نه دی،خو ډاډ ورکوي،چې ځواکونه یې د دې توان لري،چې د ټول افغانستان او په تېره له کندهار، هملند او له هرات ولایتونو دفاع وکړي.
شینواری وايي:« د وسله وال پوځ ټول منسوبین او په ځانګړې توګه هغه،چې په دغو درېیو لایتونو کندهار، هلمند او هرات کې چې اوس په لوړ تهدیداتویا بېړنی حالت کې دي،خپل ټول جګړه ییز احضارات یې نیولي او د دې توان لرو،چې له دښمنه دغه سیمې وساتو.»
له تیرو څو ورځو راهیسې د جګړې زیات شدت په لوی کندهار او هرات ولایتونو کې دی،چې له امله یې په زرګونه کورنۍ بې ځایه شوي،د مالي زیان ترڅنګ د سر زیان هم ورته اوښتی دی .
په ټوله کې غوښتنې دا دي،چې جګړه د حل لار نه ده او ښکیل اړخونه دې د سیاسي تفاهم له لارې خپلې موخې تعقیب کړي.
