د امام ابوحنیفه درېیم ملي او نړیوال نندارتون له تېرو څلورو ورځو راهیسې په کابل ښار کې د خلکو پرمخ پرانیستی دی.
په دې نندارتون کې شاوخوا ۷۰۰ غرفې اېښودل شوې چې ۴۰۰ يي کورنيو پانګوالو او ۳۰۰ يې بهرنیو پانګوالو ته ځانګړې دي.
نندارتون کې هم د تېر په شان ښځو ته ځانګړې غرفې ورکړل شوې او خپل لاسي صنایع او تولیدات يې په کې نندارې ته وړاندې کړي دي.
د نندارتون ګډون کوونکې متشبثې ښځې وايي، د تېرو نندارتونونو پرتله يې په دې نندارتون کې د لاسي صنايعو خرڅلاو ښه شوی او خلک د دوی په لاس جوړو شویو توليداتو سره آشنا شوي دي.
دوی غوښتنه کوي چې ورته نندارتونونه دې ولایتونو کې هم جوړ شي.
د نندارتون یوه ګډون کوونکې متشبثه وايي: « ما له دې وړاندې احمد شاه بابا مېنه یا ارزان قیمت کې کار کاوه او هلته خلکو پېژندلم؛ خو نندارتون کې له ګډون وروسته مې اوس ټول افغانستان جوړ کړي توکي پېژني. پلرونکو او دوکاندارانو زموږ آدرس واخیست او د پېرلو ژمنه یې وکړه.»
د نندارتون یوه بله ګډونواله هم ورته خبره کوي او وايي: « نندارتون زموږ پر خرڅلاو ډېر زیات اغېز وکړ. ډېرو زموږ جوړې جامې واخیستې او ډېرو نورو قراردادونه وکړل. له حکومت غوښتنه کوو چې دغه ډول نندارتونونه لا ډېر کړي.»
ورته مهال، یو شمېر نورې متشبثې ښځې وايي، سرپرست حکومت دې ښځو ته زمینه برابره کړي چې وکولی شي له هېواده بهر جوړېدونکو نندارتونونو کې هم خپل لاسې صنایع نندارې ته وړاندې کړي.
دوی همدارنګه له نورو ښځو هم غواړي چې کوچیني کاروبارونه پيل کړي، ترڅو يې اقتصاد پر پښو ودرېږي.
