ولایتونو کې سرچینې وایي، د طالبانو تر ولکې لاندې سېمو کې ښوونځي تړل شوي، چې له امله یې لسګونه زره ښځینه او نارینه زده کوونکي له زده کړو محروم شوي دي.
سېمه ییزې سرچینې وایي، غزني ولایت کې په ۱۴ ولسوالیو کې ښوونځي تړل شوي او ښځینه او نارېنه زده کوونکي له زده کړو بې برخې دي.
په هلمند کې د طالبانو تر ولکې لاندې سېمو کې ښوونځي تړل شوي او یوازې ګرشک ولسوالۍ کې ۲۰ زره زده کوونکي له زده کړو بې برخې دي.
د جوزجان ولایت د پوهنې ریاست وایي، ۱۵ زره زده کوونکي د دغه ولایت مرکز کې له زده کړو بې برخې دي او د طالبانو تر ولکې لاندې سېمو کې زرګونه کسان له زده کړو بې برخې دي.
کندهار، هرات، زابل او وردګ بیا هغه ولایتونونه دي چې د نورو ولایتونو پرتله په کې زیات ښوونځي تړل شوي او زده کوونکې یې خپلې راتلونکې ته اندېښمن دي.
د کندهار ولایت د پوهنې ریاست ویاند نظر محمد صمیمي وايي: «د جګړې له لاسه د کندهار په ژړۍ، ارغنداب او پنجوایي ولسوالیو کې ښوونځي تړل شوي دي.»
پوهنې وزارت هم د طالبانو تر ولکې لاندې سېمو کې زده کړو ته د زده کوونکو نه لاسرسی تائیدوي، خو د کره شمېر په اړه یې مالومات نه لري.
دغه وزارت د روان کال د زمري په شپږمه نېټه د کال نېمایې ازموینو اخېستل پيل کړي دي.
خو وايي د جګړې سیمو کې به له زده کوونکو نه د کال تر پایه ازموینه واخلي.
د پوهنې وزارت ویانده نجیبه ارین وايي:« د اسد په شپږمه نېټه د هېواد په کچه د ښوونځيو کې د کال نیمایي ازموینه پیل شوه چې یو شمیر جنګړیزو سېمو کې زده کوونکو ته د کال تر پایه هم وخت ورکړل شوی چې دغه ازموینه ورنه واخیستل شي.»
طالبانو د سېمه ییزو سرچینو او پوهنې وزارت دغه ادعا ردوي او وایي، تر ولکې لاندې سېمو کې یې ښوونځي پرانیستي دي، خو د سېمې خلکو په وینا سقوط شوي ولسوالیو کې ولس ته خبرداری ورکړل شوی دی چې خپلې لوڼې ښوونځيو ته ونه لېږي.
د پوهنې وزارت د تېرکال د شمېرو له مخې، درې مېلیونه زده کوونکي له زده کړو بې برخې دي.