افغان حکومت وايي، دغه برید پر کلکو ټکو غندي او زیاته یې کړې ده چې دغه ډول بریدونه په افغانستان کې د ملګرو ملتونو فعالیتونه له ګواښ سره مخ کولای شي او بدې پایلې به ولري.
دافغانستان د بهرنیو چارو وزارت پر نړیوالو غږ کړی چې بریدکوونکي ډله باید د جنګي جرایمو او د نړیوالو بشر دوستانه قوانینو د نقض په تور تر پوښتنو لاندې ونیسي .
د یاد وزارت مرستیال ویاند حامد تهذیب وايي: «بهرنیو چارو وزارت په هرات کې د ملګرو ملتونو پر دفتر برید په کلکو ټکو غندي او د طالبانو له لوري د تاوتریخوالي زیاتوالی د نړیوالو بشردوستانه قوانینو او د دوي نه ژمنتیا ثابتوي. له نړیوالې ټولنې زموږ هېله دا ده چې په افغانستان کې د جنګي جرایمو عاملین او د نړیوالو بشر دوستانه قوانینو ناقضين د ترجدي او قانوني څېړنو لاندې ونیسي.»
په کابل کې د ملګرو ملتونو استازولۍ په هرات کې د یوناما پر دفتر برید له شرم ډک کار بللی او عاملینو ته یې د مجازاتو غوښتنه کړې.
په افغاسنتان کې د ملګرو ملتونو استازې ډیبورا لاینز ویلي، د نړیوالو قوانینو له مخې، د ملګرو ملتونو پر کارکوونکو او دفترونو بریدنو منع دي او دغه کار ښايي جنګي جنایتونو کې راشي.
د ملګرو ملتونو د سرمنشي د ویاند مرستیاله اري کانګو وايي: «د دې بريد تر سره کوونکي بايد وپېژندل شي او مجازات شي. د وژل شوي افسر کورنۍ سره خپله خواخوږۍ شريکوو او ټپیانو ته عاجله روغتيا غواړو. د ملګرو ملتونو په پرسونل او مرکزونو بريدونه د نړيوالو اصولو له مخې منع شوي او شايد جنګي جنايت وګڼل شي.»
سپینې ماڼۍ هم دا برید غندلی او زیاته کړې یې ده چې د نړیوالو قوانینو له مخې، د ملګرو ملتونو پر کارکوونکو او دفترونو بریدونه منع دي او په افغانستان کې ملګري ملتونه د غیر پوځي بنسټ په توګه یوازې د سولې د ټینګېدو او بشري حقونو برخو کې فعالیت کوي.
