چین د طالبانو پلاوي ته په خپل هېواد کې د لوړې ردې ډیپلوماتیک پرتوکول ورکړی او د سولې ټینګښت، امنیت، سوداګرۍ او د ښو اړیګو په پاللو بحثونه شوي دي.
د چین د بهرنیو چارو وزارت ویلي، دوی هیله لري چې طالبان د خپل هېواد ملي ګټو ته لومړيتوب ورکړي، د سولې خبرې چټکې کړي او په افغانستان کې ټولې ډلې او قومونه باید سره یو شي.
د چین د بهرنیو چارو وزارت ویاند ژاو لي جیانګ وایي: «موږ هیله من یو چې طالبان به د خپل هېواد او خلکو ګټو ته لومړیتوب ورکړي. د سولې خبرو ته به چټکتیا ورکړي او سوله به خپله موخه وګرځوي، مثبت ګامونه واخلي او یو ټول شموله پالیسي پر مخ بوځي. په افغانستان کې ټولې ډلې او قومونه باید سره یو شي او د افغانانو په ملکیت او رهبرۍ خبرو ته عملي بڼه ورکړي.»
قطر کې د طالبانو د سیاسي دفتر ویاند محمد نعیم بیا چین ته د طالب پلاوي سفر په تړاو وایي: «[له چینایي چارواکو سره] په ناستو کې د دواړو هېوادونو اړونده سياسي، اقتصادي او امنيتي مسائلو، د افغانستان روان وضعیت او سولې پروسې په اړه بحثونه او تبادل د نظر وشو. د اسلامي امارت لخوا چين هېواد ته ډاډ ورکړل شو چې د افغانستان خاوره به د هېڅ هېواد د امنيت پر خلاف نه استعمالېږي. چین هېواد له افغان ولس سره د خپلو همکاريو د دوام او پراختيا ژمنه وکړه او ويې ويل چې دوی د افغانستان په چارو کې مداخله نه کوي.»
ځینو نړيوالو رسنیو بیا د چینايي چارواکو له قوله راپور ورکړی چې چین له طالبانو غوښتي تر څو د ختیځ ترکستان له اسلامي ډلې او پاکستاني طالبانو سره خپلې اړیکي پرې کړي.
افغان حکومت له دې غوښتنې هر کلی کړی دی.
د هېواد د بهرنیو چارو وزارت وایي: «د چین د خلکو جمهوریت چارواکو د طالبانو له پلاوي سره د لیدنې په ترڅ کې له دې ډلې څخه غوښتي چې، د ختیځ ترکستان غورځنګ او نورو ترهګرو ډلو سره خپلې اړیکې پرې کړي.د افغانستان اسلامی جمهوري دولت د چین دولت له دې دریځ کلکه هر کلی کوي.»
د امریکا او طالبانو له هوکړې وروسته طالبانو بېلابېلو هېوادونو ته سفرونه وکړل، چې د رسمي ادرس په څېر یې د سیمې او نړۍ له هېوادونو سره د افغانستان په مسئله باندې خبرې کړي دي.
ملګرو ملتونو هم د طالبانو د سیاسي دفتر له غړو څخه تر لږ تر لږه دری میاشتې محدویت لرې کړی او په دې موده کې کولی شي چې هر ځای ته سفر وکړي.