Skip to content
د سولې په چارو کې د دولت وزارت په څلور میاشتني راپور کې ویل شوي چې د روان ۱۴۰۰ کال د حمل میاشتې له پيله تر جوزا میاشتې پورې وسله والو طالبانو پر افغان ځواکونه په منځنۍ کچه هره ورځ ۱۸۳ لوی او واړه برېدونه کړي دي.
راپور کې ویل شوي چې په همدې موده کې بیا ۲۴ زره طالبانو او ۵ زره ملکيانو ته مرګ ژوبله اوښتې دي.
د سولې په چارو کې د دولت وزارت د څلور میاشتني راپور یوه برخه: « وروستيو څلورو مياشتو کې طالبانو ۲۲ زره بريدونه کړي. ۹۳ ځانمرګي بريدونه،۶۵۰ راکټي بريدونه، ۱۶۷۵ ماين چاودنې، ۸۴۴ هدفي وژنې او ۶۲۳ مخامخ نښتې او ډله ییز بریدونه.»
د سولې په چارو کې د دولت وزارت مالوماتو کې نه دي راغلي چې په دومره شمېر بريدونو کې افغان ځواکونو ته څومره زيان اوښتی دی.
د راپور یوه برخه: «په تېرو څلورو مياشتو کې ۵۵۸۷ ملګيان ټپيان او وژل شوي دي. وژل شویو کې ۱۴۴۶ نارينه، ۶۵۰ ښځې او ۹۲۵ ماشومان شامل دي.»
جګړه کې دواړه خواوې یو بل ته د درنې مرګ ژوبلې اړولو او پرمختګونو ادعاوې کوي، خو د جګړې لوی زيان عامو خلکو ته اوښتی دی.
د ماشومانو او لويانو په ګډون وروستيو څلورو میاشتو کې تر پنځو زرو زيات ملکيان وژل شوي او ټپيان شوي او لسګونه زره نور له خپلو مېنو بېځایه شوي، چې د نړیوالو بشري سازمانونو اندېښنې یې راپورته کړي دي.
د راپور یوه برخه کې راغلي:« څلورو مياشتو کې ۲۴۶۰۹ طالبان وژل شوي، ټپيان شوي او ځينې نیول شوي دي. د غبرګولې یا جوزا مياشت د طالبانو لپاره تر ټولو وژونکې وه، چې ۵۵۰۰ طالبان په کې وژل شوي.»
عامه تاسياستو، اقتصادي، ښونيز او تحصلي سيستم هم له جګړې سخت زيان ليدلی.
د سولې وزارت د تاوتريخوالي د کمولو او څارنې مشر عبدالله هاشمي وايي: «د طالبانو تر واک لاندې سيمو کې ۶۲۱ بابه ښوونځي تړل شوي، چې ۴۲ سلنه زده کونکي له زده کړو پاتې شوي.»
اخوا د ملي روغې جوړې عالي شورا يوځل بيا ټینګار وکړ چې د جګړې زيانونه ټولو ته رسېږي او دوام یې هېڅ ديني رېښه نه لري.
د ملي روغې جوړې عالي شورا مرستيال عطا الرحمن سليم وايي: « د جګړې لپاره اوس هم توجيه لټول کېږي، چې ګوندې مقدسه ده، خو ديني علماوو دا هرڅه واضيح کړي چې دا جګړه ديني رېښه نه لري.»
د سولې په چارو کې د دولت وزارت په څلور مياشتني راپور کې راغلي، له کله چې بهرني ځواکونه وتلي، طالبانو هره مياشت په اوسط ډول پنځه دېرش سلنه بريدونه زيات کړي.
طالبانو د دې راپور په اړه تر اوسه پورې څه نه دي ويلي.
