پاکستاني رسنيو راپور ورکړی هغه نهه تنه افغان اتباع یې د کراچۍ په هوايي ډګر کې نیولي چې پاکستان ته په جعلي طبي اسنادو ورغلي او غوښتل یې درېیمو هېوادونو ته لاړ شي.
په دې اړه خپرو شویو راپورونو کې ويل شوي، دغه افغان اتباع په تېرو درېیو ورځو کې نیول شوي دي.
په راپورونو کې د پاکستاني چارواکو له قوله ويل شوي، يادو افغانانو د درملنې د جعلي طبي اسنادو په وسیله د پاکستان وېزې ترلاسه کړې او په دې سره یې د سفر له وېزو ناوړه ګټه اخیستې ده.
دا په داسې حال کې ده چې پاکستان په وروستيو کلونو کې افغانانو ته د وېزو ورکول سخت کړي او دې هېواد ته تلونکي افغانان اړ دي چې تور بازار کې د پاکستان وېزې د زرګونه ډالرو په بدل کې تر لاسه کړي.
د سیاسي چارو شونونکی جنت فهیم چکري وايي: « پاکستان تل هڅه کړې چې پر افغان مهاجرو فشار وارد کړي ترڅو هغوی په تکلیف کړي او بیا د یوې سیاسي وسیلې په توګه ترې ګټه واخلي او د اسلامي امارت پر حکومت خپلې غوښتنې ومني. اسلامي امارت ته په کار ده چې له افغانستانه د خلکو د وتلو اصلي لامل پیدا کړي او د ستونزو په هوارولو سره د هغو کسانو مهاجرت مخه ونیسي چې غواړي ګاونډیو هېوادونو ته کډه شي.»
د راپورونو له مخې، یو شمېر افغانانو پاکستان ته له تګ وروسته په اسلام آباد، لاهور او کراچۍ کې امريکا، جاپان او د نړۍ نورو هېوادونو ته د سفر کولو لپاره د يادو هېوادونو له سفارتونو او کونسلګریو د وېزو غوښتنه کړې.
په همدې حال کې، پاکستاني چارواکو ویلي، د انساني قاچاق ضد ادارې د هغو کسانو پر وړاندې درې جلا دوسیې ثبت کړې چې د محکمې په حکم زندان ته استول شوي.
د سیاسي چارو شنونکی محمدزلمی افغانیار وايي: « پر هغو کډوالو د فشار راوړلو اصلي موخه چې د درملنې لپاره پاکستان ته ځي دا ده چې پاکستان غواړي د افغانستان پر اوسني حکومت فشار راوړي. زه هیله لرم د بشري حقونو او کډوالو ملاتړ بنسټونه دغه هېواد ته وریاده کړي چې د کډوالۍ پروټوکولونه رعایت کړي. له بلې خوا، که غواړي له افغانستان سره تعامل ولري، دغه تعامل باید د دواړو خواوو د ملي ګټو خوندیتوب په رڼا کې وي.»
وړمه ورځ د کندهار، ننګرهار، نیمروز او هرات له لارې له دوو ګاونډو هېوادونو څخه ۱۷۵ کورنۍ بېرته هېواد ته راستنې کړل شوې دي.
ایران او پاکستان په دې وروستیو کې د کډوالۍ نړيوالو اصولو خلاف پر افغان کډوالو کړۍ راتنګه کړې او په زور يې له خپلې خاورې وباسي.
