وروسته له هغې چې د ملګرو ملتونو عمومي غونډه کې د افغان ښځو د اوسني وضعیت په هکله اندېښنې وښودل شوې، د دې غونډې په څنډه کې د يوې ناستې پرمهال د امريکا د سينما اداکارې هم په افغانستان کې د ښځو د آزادۍ په اړه خبرې کړې خو د هغې څرګندونې افغان ښځو ته سپکاوی بلل شوی.
ميرېل سټريپ يادې ناستې ته په خبرو کې د افغان ښځو آزادي د حيواناتو له آزادۍ سره پرتله کړې او ويلي يې دي چې دا مهال په افغانستان کې د ښځو پرتله ځينې حيوانات زياته آزادي لري.
هغه زیاته کړې: « په کابل کې حتا یوه پیشو هم د ښځې پرتله ډېره آزادي لري. نن ورځ په افغانستان کې د یوې نجلۍ پرتله مرغۍ ډېر حقوق لري او له نړیوالې ټولنې غوښتنه کوو چې د افغان نجونو او ښځو تر څنګ ودرېږي.»
په ملګرو ملتونو کې د افغانستان سرپرست استازي د دې څرګندونو په اړه غبرګون ښودلی او د غندنې ترڅنګ يې دغه شان څرګندونې د افغان ښځو سپکاوی بللی دی.
په ملګرو ملتونو کې د افغانستان سرپرست استازي نصیر احمد قایق ویلي: « دا پرتلنه د هغو زړورو افغان ښځو او نجونو وقار ته زیان رسوونکې ده چې د طالبانو د ظلمونو پر وړاندې ولاړې دي او د خپلو اساسي بشري حقونو د بېرته ترلاسه کولو لپاره مبارزه کوي. موږ باید د دوی د زغم او زړورتیا ستاینه وکړو.»
د سیاسي چارو شنونکي وایې، په افغانستان کې د نجونو پر زده کړو لګول شوی محدودیت او د ښځو پر دندو بندیز هغه څه دي چې له نړیوالو سربېره یې افغانان هم د لرې کولو غوښتونکي دي.
خو په خبره يې، د نړیوالو له لورې ورته نظرونه په افغانستان کې له شته وضعیت سره توپیر لري او نړیوال دې له دا ډول پرتلنو ډډه وکړي.
د سیاسي چارو شنونکی سلیم پیګیر وايي: « سمه ده چې ښوونځي او پوهنتونونه تړلي دي او ښځې په یو شمېر ادارو کې د کار اجازه نه لري؛ مګر دا چې هغوی افغانې ښځې له یوه حیوان سره تشبېح کوي، دا یوه لویه جفا ده.»
ورته مهال، یو شمېر نور شنونکي خبرداری ورکوي، که سرپرست حکومت د نجونو زده کړو او د ښځو کار ته اجازه ورنه کړي، د نړیوالو ورته غبرګونونه ښايي د دواړو لورو ترمنځ د اړیکو لا خرابېدو لامل شي.
د سیاسي چارو شنونکی جنت فهیم چکري وايي: « دا څرګندونې د افغانستان ټولو ښځو ته توهین او په سپکه سترګه کتل دي. زه هیله لرم د افغانستان ښځې د دې خبرې ځواب ورکړي. هو! د زده کړو او کار په برخه کې محدودیتونه شته، خو هیله ده چې دغه محدودیتونه ژر تر ژره لرې شي.»
واک ته د اسلامي امارت په رسېدو سره، هېواد کې له شپږم ټولګي پورته د نجونو پر زده کړو او د ښځو پر کار محدودیتونه وضع شول چې دغه کار د نړیوالې ټولنې او سرپرست حکومت ترمنځ اړيکې د نږدې کېدو پر ځای لا سره لرې کړې.
