د اسلامي امارت رهبر شیخ هبتالله اخوندزاده په دې وروستيو کې په پرله پسې توګه مسوولینو ته له ولس سره د غوره چلن لارښوونې کوي.
اخوندزاده تازه په کندهار کې د پولیسو له اکاډمۍ د نويو پوليسو د فراغت په غونډه کې د خبرو پرمهال سپارښتنه کړې چې پوليس باید د دندې پرمهال له عامو خلکو سره له نرمۍ کار واخلي.
د اسلامي امارت رهبر په دې فراغت غونډه کې چې د سرپرست حکومت يو شمېر لوړ پوړو چارواکو هم په کې ګډون درلود، ټينګار کړی چې پوليس دې له ولس سره پر ښه چلن سربېره له بيتالمال کلکه ساتنه او د خپلو مشرانو د اوامرو اطاعت وکړي.
هغه زیاته کړې: « تاسې مه مایوسه کېږئ. زه تاسې ته ډاډ درکوم چې اسلامي امارت ورځ تر بلې د ښه کېدو په حال کې دی او خلک دې له اسلامي امارت سره اوږه په اوږه ودرېږي. له ولس سره نېکه رویه وکړئ، د بیت المال پوره خیال وساتئ، تکبر او غرور مه کوئ دا د الله ﷻ امتحان دی. کوښښ وکړئ چې په ښه ډول کامیاب شي.»
د اسلامي امارت رهبر له دې وړاندې شمالي ولایتونو ته د سفر پرمهال د لومړي ځل لپاره د قوشتېپې کانال او پر همدې کانال له تېر شویو دوو پلونو، ریل پټلۍ او ټرانزیټي لارو لېدنه کړې او ډاډ يې ښودلی چې د ورته ملي پروژو په پلې کولو سره به افغانستان د بهرنيو مرستو له احتياج خلاص شي.
د سیاسي چارو کارپوهان ولايتونو ته د اسلامي امارت رهبر سفرونه ګټور بولي او زياتوي، په دې توګه پر سرپرست حکومت د خلکو باور لا ډېرېدلی شي.
د سیاسي چارو شنوونکی محمد سلیم پیګیر وايي: « له قوشتېپې کانال څخه د اسلامي امارت د رهبر لیدنه څرګندوي چې د اسلامي امارت مشرتابه سترو اقتصادي پروژو ته ارزښت ورکوي.»
د اقتصادي چارو کارپوهان د لا ډېرې پاملرنې غوښتنه کوي او وایي، د اسلامي امارت رهبر دې د قوشتېپې کانال په څېر سترو پروژو پلي کولو ته جدي پاملرنه وکړي، ترڅو زرګونو خلکو ته په کې د کار کولو زمینه برابره شي.
د اقتصادي چارو کارپوه آصف ستانکزی وايي: « رېل پټلۍ، د افغانستان کانونو استخراج او له افغانستان څخه د باندې صادرولو او دغه راز د نړیوال تجارت لپاره ډېره اړینه او حیاتي ده. د اوسپنې پټلۍ او د قوشتېپې کانال په څېر پروژې کولی شي افغانستان یوه خپلواک اقتصاد ته ورسوي.»
د اسلامي امارت رهبر شمالي ولايتونو ته د خپل ۱۴ ورځني سفر په لړ کې له اړوند چارواکو، ديني عالمانو او قومي مشرانو سره ليدلي او له دوی يې د شريعت عملي کولو غوښتنه کړې.
