د سیاسي چارو یو شمېر تحلیل کوونکي وايي، د پلاکستان پلازمېنه اسلام اباد کې د افغان سفیر نجیب الله علي خیل د لور سلسلې علي خېل تښتونه د دیپلوماسۍ د ټولو نړیوالو کنوانسینونو او اصولو خلاف کار دی او تر شاه یې سیاسي اغراض موجود دي.
دوی د افغان سفیر د لور اختطاف پر افغان حکومت د پاکستان یو ډول فشار یادوي، چې په وینا یې که اسلام باد کابل قانع نه کړي، نو شاید د دواړو هېوادونو ترمنځ ډیپلوماتیکې اړیکې پرې شي.
دوی زیاتوي، که اسلام اباد د دغې پیښې عاملین مجازات نه کړي او د کابل قناعت ترلاسه نه کړي، نو د دواړو هیوادونو ترمنځ د ډیپلوماتیکو اړیکو د پرې کېدو امکان شته.
د باور غورځنګ مشر نجیب ازاد وايي: « په اسلام اباد کې دافغان سفیر دلور تښتونه او شکنجه دټولو نړیوالو دیپلوماتیکو اصولو خلاف کار دی او دا کار عادي خلک نه شي کولای، چې په دې سره به افغانستان او پاکستان ترمنځ دیپلوماتیکې اړیکې لاپسې خړې پړې کړي.»
غوښتنه داده چې افغان حکومت باید دغه مسله چې ټول افغان ملت ته سپکاوی شوی د د یپلوماتیکو چینلونو له لارې په جدي توګه تعقیب او افغان ولس ته قناعت ورکړي.
خو په دې تړاو دافغانستان د بهرنیو چارو وزارت یوازې یوه اعلامیه خپره کړې، چې په کې د افغانستان سفیر له حضاره خبر ورکړل شوی دی.
د بهرنیو چارو وزیر محمد حنیف اتمر هم تر اوسه پورې دغې مهمې مسلې په تړاو چې د افغان ولس عزت په کې تر پښولاندې شوی دی، هېڅ نه دی ویلي او نه یې هم د خپلې فیسبوک او ټویټر په پاڼو څه لیکلي دي.
په ورته مهال په اسلام اباد کې د طالبانو د واکمنۍ پرمهال د افغانستان سفیر ملا عبدالسلام ضعیف پر خپلې ټویټر پاڼې لیکلي چې په پنجاب کې د افغان سفیر د لور تښتونه د ټول افغان ولس عزت پورې تړاو لري او باید پوښتنه یې وشي.
په اسلام باد کې پخوانی افغان سفیر ملا عبدالسلام ضعیف زیاته کړه:« په پنجاب کې د افغان سفير د لور تښتونه او تعذيبول د ټولو افغانانو د عزت موضوع ده، بايد د هرافغان له خوا پر کلکه وغندل شي اوهم يې پوښتنه وشي.»
په کابل کې بیا دپاکستان سفیر وايي، حکومت یې په اسلام اباد کې د افغان سفیر له لور سره د شوې پیښې په اړه څېړنې پیل کړي او د څیړنو پایله به په وخت افغان حکومت سره شریکه کړي.
په کابل کې د پاکستان سفیر منصور احمد خان وايي:« د پاکستان کورنیو چارو وزیر شیخ رشید احمد د لومړي وزیر عمران خان پرر لارښوونه څېړنې پيل کړي دي او د دغو څېړنو له بشپړېدو وروسته به یې پایلې د افغانستان له حکومت سره شریکې شي.»
په دیپلوماتیکو اصولو کې کوربه هېواد د ډیپلوماتانو او د هغوي د کورنۍ خوندیتوب پر غاړه لري، خو پاکستان په دغه برخه کې ناغېړي کړې.
د تیرې جمعې په ورځ په اسلام اباد کې دافغان سفیر نجیب الله علي خیل لوري سلسله علي خیلي د نامالومو کسانو له لوري د څو ساعتونو لپاره تښتول شوې وه،چې په کوردننه یې سخت غبرګونونه راوپارول.
