د دولتي ادارو د یو کلنو لاسته راوړنو د تشرېح په لړ کې د یکشنبې په ورځ (د ۱۴۰۳ کال د وږي میاشتې پر ۱۸ مه) د سرحدونو، قومونو او قبایلو چارو وزارت خپلې کلنۍ لاسته راوړنې له رسنیو سره شرېکې کړې.
دغه وزارت چارواکي وايي، د تېر یوکال په موده کې د قومونو ترمنځ د یووالي او اوسني نظام د ملاتړ په موخه ۳۴ لویې ولسي غونډې، د زونونو پر کچه ۳ سترې فوق العاده غونډې او دغه رازد د ولایتونو پر کچه ۱۹۶ ولسي ناستې جوړې شوې دي.
دوی زیاتوي، د قومونو ترمنځ یووالی او اتحاد یې اصلي موخه ده او په دغه برخه کې په جدي توګه کار کوي.
د سرحدونو، قومونو او قبایلو چارو وزارت د سرحدي چارو مرستیال مولوي محمد اسماعیل غزنوي وايي: « د وزارت له پلان سره سم د هېواد په ټولو ولایتونو کې د زرګونه دیني علماوو، قومي مشرانو او مخورو په ګډون۳۴ لویې ولسي غونډې، د امیرالمؤمین له حکم سره سم د زونونو پر کچه ۳ فوق العاده غونډې د ۱۶ ولایتونو د زرګونو کسانو په ګډون د اسلامي نظام او ملي یوالي او استحکام تر نامه لاندې جوړې شوې دي.»
همدارنګه غزنوي وايي، د تېر یو کال په موده کې یې د قومونو او کورنیو ترمنځ ۳۰۴ سترې او ۵۲۵ کوچنۍ شخړې او دوښمنۍ چې له امله یې سلګونو کسانو ته مرګ ژوبله اوښتې وه او د میلیونونو افغانیو په ارزښت یې مالي زیانونه اړولي وو، حل کړې دي.
هغه زیاتوي: « د سرحدونو، قومونو او قبایلو چارو وزارت تېر کال په ولایتونو، ولسوالیو او لرې پرتو سیمو کې د قومونو ترمنځ ۳۰۴ لویې او ۵۲۵ کوچنۍ شخړې او دوښمنۍ چې له امله یې سلګونه کسان مړه، ټپیا او د میلیونونو افغانیو په ارزښت مالي زیانونه اړولي و، هوارې کړې دي.»
د یاد وزارت د چارواکو په خبره، په تېر یوه کال کې ۷۰۰ ستونزې ورسره شریکې شوې چې تردې دمه یې ډېری هغو ته رسېدنه کړې او په پاتې نورو یې کار روان دی.
د دغه وزارت د قبایلو چارو د جرګو او همغږۍ مرستیال محمد علي جان احمد وايي، شریکې شوې ستونزې خلکو ته د اسانتیاوو برابرولو په برخه کې وې او په هواري سره یې تر اوسه په بېلابېلو برخو کې ۴۰۰ پروژې پلې شوې دي.
احمد زیاتوي: « د ولس استازي په دې غونډو کې له موږ سره ګډون کوي او خپلې غوښتنې، ستونزې او اړتیاوې له موږ سره شریکوي. موږ دغه ستونزې د دوی په استازیتوب له نورو ادارو سره تعقیبوو، ترڅو یې اړوند چارواکو ته ورسوو او هوارې یې کړو؛ موږ په دې برخه کې ډېرې لاسته راوړنې لرو.»
د سرحدونو قومونو او قبایلو چارو وزارت چارواکي وايي، د رسمي پولو خوندیتوب په موخه د سرحدي پیلرونو، صفري نقطو او همدا راز د سرحدي خط او د ډيورنډ فرضي کرښې په اوږدو کې د ګاونډیوهېوادونو له سرغړونو څارنه شوې او پر وخت یې مالومات راټول شوي دي.
دوی زیاتوي، د کوچیانو هر ډول انساني او حیواني ستونزو ته رسېدنه شوې او د زده کړو زمینې ورته برابرې شوې دي.
د چارواکو په خبره، په مرکز او ولایتونو کې د رحمان بابا او خوشحال خان د لېسو په شمول لسګونو تعلیمي مرکزونو کې زرګونو کسانو ته یې د زده کړو زمینه برابره کړې ده.
