د پخواني ولسمشرحامد کرزي، حکمتيار او عبدالله عبدالله په ګډون د چارواکو او سياستوالو یو ګډ پلاوي نن له ولسمشر غني سره په ارګ کې پر هغو صلاحیتونو خبرې کولې،چې دوی یې طالبانو سره د مذاکراتو لپاره بايد ولري.
ولسمشر غني د پلاوي له غړو سره نه دي لیدلي او په دوه ورځني رسمي سفر ازبکستان ته ولاړ.
یوې سرچینې له نوم ښوولو پرته شمشاد ته وویل، سیاسي رهبرانو سره د ملي روغې جوړې عالي شورا کې د بندو دروازو ترشا ناسته شوې ده او ان خپلو مطبوعاتي مامورینو ته یې هم په کې د ګدون اجازه نه ده ورکړل شوې.
خو د جمهوریت ډلې مرکچي وایي، دوه ورځو کې به دا پلاوی د خبرو اترو لپاره قطر ته ولاړ شي.
د جمهوریت مذاکراتي ټیم غړی نادر نادري وايي:« هغه څه چې د سیاسیونو دویمه ډله دوحه کې یوځای کېږي او بحثونه کوي دا د طالبانو یوه بهانه وه،چې یو شمېر سیاسیون هم وي اوس دا بهانه هم پای ته رسیږي،خو هغه څه چې چې موږ سولې ته رسوي،هغه عملي حل لار ده چې خبرې دي.»
ټول جنجالونه د واک او صلاحیتونو پرسر دي، د بنديانو خلاصون، اوربند، له تور لېسته د طالب مشرانو د اېستلو چاره، انتقالي حکومت، د ولسمشر غني د اوسني حکومت وخت، دندې…، د واک د لېږد میکانیزم او نور داسې مسایل شته،چې دوحې ته تلونکی پلاوی يې په اړه له ولسمشر غني د پرېکړو واک صلاحيت غواړي.
د سیاسي چارو شنونکي وايي، که سیاسیتوالو ته لازم صلاحيتونه ورنه کړل شي، نو سیاستوال ښه نه ګڼي چې طالبانو سره د خبرو لپاره دوحې ته ورشي.
د سیاسي چارو شنونکی طارق فرهادي وايي:« دوحې ته د سیاسيونو تګ ښایي تر اختره ځنډېدلی وي،ولې د دې لپاره چې ولسمشر حاضر نه ده هلته د ده د استعفاء په اړه خبره وشي.اصل بحث همدا ده،چې ولسمشرغواړي په پلاوي کې خپل کسان زیات کړي ترڅو بحث بل خوا ته بوځي.هغه څه چې لازم دي هغه دا ده،چې ولسمشر استعفاء وکړي او یو بل قابل قبول حکومت راشي.که ولسمشر غواړي،بیا کاندید شي هغه یو بحث کېدای شي، خو دا چې بحران حل شي، باید استعفاء وکړي چې تیار نه دی.»
له کابل څخه قطر ته تلونکي پلاوي ته تمې زیاتې وي،خو د سولې بهیر څارونکي وايي، د پلاوي سفر ځنډېدل د سولې بهیر پر زیان دی.
له هغې راهیسې چې بین الافغاني خبرې پيل شوي، تر اوسه د موضوعاتو پر سر خاص پرمختګ نشته،چې دې حالت هم نظامي او هم سیاسي برخه کې بې باوري او د تمي خلاف حالت رامنځته کړی دی.
بل پلو طالبان وايي، چمتو ديچې د خبرو د پرمختګ د سوله ییز حل لپاره له سیاسیونو سره خبرې وکړي.
طالبانو د خبرو اترو میز پرېښی او ډېری تمرکز یې د سیمې او ګاونډیو هېوادونو باندې ده څو دوی ته خپله اراده په ډاګه کړي.
حکومت وایي، طالبانو د درې میاشتې اوربند په بدل کې د ۷ زره بندیانو خوشې کېدل غوښتي دي او دغه راز یې ویلي دي،چې د مشرانو نومونه یې له تورلیست څخه پاک شي.
د جمهوریت مذاکراتي ټیم غړی نادر نادري وايي:« هغوی د اوربند په اړه د درې میاشتو یوه طر حه لري،چې ۷ زره بندیان یې ازاد او نومونه یې له تورلیست څخه حذف شي، تر څو کامله ازادي ترلاسه کړي،خو د درې میاشتو اوربند لپاره دا یوه درنه غوښتنه ده.»
داسې راپورنه هم شته،چې دوحې ته د تلونکي سیاسي پلاوي په لیست کې حامد کرزی، حکمتیار او کریم خلیلي په شا شوي او ارګ په دې یولس کسیز پلاوي کې د ملي شورا د مشرانو او د چارو ادارې د ریس نومونه ور زیات کړي، خو په رسمي توګه حکومت په دې اړه څه نه دي ویلي.