د عناب مېوه له تېرو ۱۰۰ کلونو راهیسې د افغانستان په فراه ولایت کې یې رواج موندلی او ګڼ شمېر باغونه یې جوړ شوي دي.
د دغه ولایت بڼوال د عنابو سږنيو حاصلاتو ته خوښ دي او وايي، د نورو مېوو پرتله ښه عاید لري.
که څه هم بڼوال د عنابو په حاصلاتو کې زیاتوالي ته خوښ دي،خو وايي، د بڼوالۍ په برخه کې مسلکي کسان نه لري او د عنابو د پلور لپاره مناسب بازار نه شته.
بڼوال له مسوولینو غواړي چې حاصلاتو ته یې د بازارموندنې ترڅنګ د عنابو د بڼوالۍ په اړه د ملسکي کسانو په وسیله بڼوالو ته روزنه ورکړي.
یو تن بڼوال اسماعیل وايي:« له اسلامي امارت غوښتنه کوو چې د عنابو سوداګرۍ ته پاملرنه وکړي. موږ خپل راټول کړي عناب په ډېره ټيټه بیه پلورو.»
د عنابو یو بل بڼوال عبدالکریم وايي:« موږ ته په سمه توګه رسېدنه نه ده شوې، دا ځای له مرکز څخه لرې پروت دی. باید د حکومت پاملرنه زیاته شي. نه یوازې دا چې زموږ مېوې رسنیزه، تجارتي او بازاري بڼه نه ده ورکړل شوې، بلکې له ایران د ورداتي عنابو مخه هم نه ده نیول شوې.»
همدارنګه د عنابو بڼوال شراف الدین بیا وايي:« له بده مرغه حکومت زموږ بڼوالۍ، کرنې او مالدارۍ ته هېڅ پاملرنه نه ده کړې او نه یې زموږ عناب بهرنیو هېوادونو ته صادر کړي. څومره چې موږ زحمت باسو، هغومره نه پلورل کېږي.»
د فراه ولایت د کرنې، اوبو لګولو او مالدارۍ ریاست مسوولین هم دغه ولایت کې د عنابو په حاصلاتو کې د ۲۰ سلنې زیاتوالي خبره کوي او زیاتوي چې د بڼوالو حاصلاتو ته د بازار موندنې ترڅنګ به د مسلکي روزنې هڅې هم وکړي.
د فراه کرنې، اوبو لګونې او مالدارۍ ریاست مرستیال محمد داوود حنفي وايي: « د بزګرانو او سوداګرو له ډلې ۱۰۰ تنه د یوې همکارې موسسې له خوا سروې شوي، ترڅو د عنابو په اړه روزنه ورکړل شي. دغو کسانو ته اړوند وسایل هم ورکول کېږي. موږ پلان لرو، چې په بازارونو او سوداګریزو مارکېټونو کې د عنابو لپاره بازار موندنه وکړو.»
د مسوولینو د مالوماتو له مخې، اټکل کېږي، چې روان کال کې به د فراه ولایت له ۱ زره ۳۳۶ هکټاره باغونو څخه ۴ زره ۲۷۵ ټنه عناب ترلاسه شي.
