د کندهار ولایت اطلاعاتو او کولتور ریاست چارواکي وايي، د کمپيوټر په ګډون یې د عصري علومو په لنډمهاله ټولګیو کې تر ۸۰۰ زیاتو ځوانانو ته وړیا روزنه ورکړې او ګڼ شمېر نور تر روزنې لاندې دي.
په دغو وړیا کورسونو کې برخه اخیستونکي ځوانان د اطلاعاتو او کولتور ریاست له دغه ګام هرکلی کوي او غواړي چې د اړمنو ځوانانو لپاره د وړیا زده کړو ټولګي نور هم زیات شي.
د وړیا ټولګي یو تن زده کوونکی شفیع الله وايي: « درې اوونۍ کېږي چې زه دلته د کمپيوټر زده کړه کوم. له چارواکو مننه کوم چې موږ ته په وړتیا توګه کمپیوټر را زده کوي.»
یو بل زده کوونی رحیم الله هم وايي: «زه ډېر خوشاله یم چې دلته زده کړې کوم. ټاکل شوې د کمپیوټر څلور پروګرامونه زده کړم چې په دې کې وینډوز، ورډ، ایکسل او پاورپاینټ شامل دي.»
په اوسنيو شرايطو کې چې خلک له اقتصادي ستونزو سره مخ دي د وړيا زده کړو زمینه برابرول له مهمو اړتیاوو څخه ګڼل کېږي.
د ځوانانو په خبره، وړیا زده کړې ښه فرصت دی او باید ترې ګټه واخیستل شي.
زده کوونکی قدرت الله وايي: « دلته زده کړې وړیا دي، زه له نورو ځوانانو هم غوښتنه کوم چې راشي او زده کړې وکړي.»
زده کوونکی وحید احمد وايي: « موږ د دغه غوره ګام هرکلی او ستاینه کوو. دلته ځوانانو ته یو ښه فرصت برابر شوی او ځوانان هم باید له دې وړیا فرصت څخه ګټه واخلي. دلته د کمپیوټر اداري پروګرامونه په وړیا توګه ورښول کېږي.»
د دغو ټولګیو له پيل راهیسې، يوازې په تېر يوه کال کې د اطلاعاتو او فرهنګ رياست په ښوونيز مرکز کې نږدې ٨٠٠ ځوانان روزل شوي دي.
د ياد ښوونيز مرکز مسوولين وايي، ځوانانو ته يې د انګليسي ژبې، ترکي ژبې ، کمپيوټر او پریلانسینګ ټولګيو په ګډون په بېلابېلو برخو کې وړيا کورسونه جوړ کړي دي.
د کندهار د اطلاعاتو او کولتور ریاست ښوونیز مرکز مسوول نذیر احمد عمري وايي: « تېر یو کال دلته په بېلابېلو برخو کې له ۷۰۰ تر ۸۰۰ کسان له روزنې وروسته فارغ شوي. په دې کې د انګلیسي ژبه، کمپيوټر، ترکي ژبې، عربي ژبې پري لاسنېنګ او ځینې نورې زده کړې شاملې دي چې د مجربو ښوونکو له خوا تدریس کېږي.»
د يادونې وړ ده چې د کندهار ښار تر څنګ د یاد ولایت په ميوند ولسوالۍ کې هم وړيا ښوونيز مرکز جوړ شوی او اوسمهال لسګونه ځوانان په کې عصري زده کړې کوي.
