په کابل کې د لوی اختر په را نږدې کېدو سره د څارويو منډيي کې څاروي ډېر،خو اخېستونکي یې کم دي.
د کابل ښار یو شمېر اوسېدونکي وايي، سږ کال د څارويو بيې لوړې دي،چې له امله به يې زيات خلک د قربانۍ وس ونه لري.
د کابل ښار یو تن اوسېدونکی وايي:« د څارويو بيې لوړې دي، که نور څوک نه وي نو دولت بايد ټکسونه راکم کړي ترڅو د څارويو بيې ټيټې شي.»
د کابل ښار اوسېدونکی:« بيې لوړې دي، څاروي په چا اخلې، کار نشته، څوک همداسې ګرځي، چاته کار نه پيدا کيږي نو په څه شي به څاروي واخلي.»
له يوې خوا کورونا وبا او جګړو خلک له اقتصادي پلوه ځپلي او له بلې خوا څاروي پلورنکي وايي، په لاره کې ترې وسله وال طالبان او د ګمرکونو له خوا لوړ ټکس اخېستل کېږي،چې ورسره د څارويو بيې لوړې شوی دي.
څارویو پلورونکی:« دلته راڅخه محصول اخېستل کېږي،مېدان ښار کې رانه اخېستل کېږي،که له مزار يې راوړو نو مزار کې محصول اخلي، د طالبانو خطونه پراته دي، هغوی هم رانه محصول اخلي، بغلان کې يې محصول اخلي، موږ نور تباه شولو.»
څاروي پلورونکی:« محصول لوړی دی. خلک کاروبار نه لري،خلک شکايت کوي،چې څاروي ګران شوي،خو په اصل کې موږ ته پر لوړه بيه پرېوتي.»
څاروي پلورونکي وايي، په غټو څارويو کې د تېرو کالونو پرتله له پينځو نيولې تر لسو زرو افغانيو قيمت لوړ شوی دی،چې له کبله يې ډېری خلک د څارويو اخېستلو ته زړه نه ښه کوي.
