ولسمشرۍ ماڼۍ وایي، ولسمشر اشرف غني د یوه لوړ پوړي دولتي پلاوي په مشرۍ د منځنۍ او جنوبي اسیا، سیمه ییز اتصال، فرصتونه او ننګونې نړیوالې غونډه کې د ګډون په موخه نن سهار اوزبیکستان ته ولاړ.
افغان ولسمشر به په دغه غونډه کې د ګډون سربېره د ازبیکستان له ولسمشر شوکت میرضیایف سره هم وګوري.
ارګ وایي، چې ولسمشر غني به د ځینو هېوادونو له استازو سره په جلا جلا کتنو کې د نوي فصل په چوکاټ کې له افغانستان سره د دوستانه او دوامداره اړیکواو په بېلابېلو برخو کې د همکاریو پر پراختیا خبرې وکړي.
ټاکل شوې، چې د منځنۍ او سویلي اسیا او سیمه ییز اقتصادي اتصال فرصتونه او ستونزې په نوم غونډه به نن د ازبکستان په پلازمېنه تاشکند کې پیل شي.
په دغه غونډه کې د شاوخوا ۴۰ هېوادونو او نړیوالو سازمانونو استازي ګډون کوي، چې ولسمشر غني به د افغانستان او ازبیکستان پر اړیکو هم خبرې وکړي.
ارګ ویلي، ولسمشر تاشکند ته دوه ورځنی سفر کوي چې تر ډېره به بحث تر اقتصادي راکړې ورکړې راوڅرخي.
دغې غونډې ته د افغان سولې لپاره د امریکا ځانګړی استازی زلمی خلیلزاد هم ورځي او امریکایي پلاوی به د مرکزي اسیا د پنځو هېوادونو د مشرانو ترڅنګ د اُتریش، چک جمهوریت، هنګري، سلواکیا او سلووینیا له مشرانو سره د افغانستان پر امنیتي وضعیت خبرې وکړي.
په یاده ناسته کې اروپایي ټولنه هم غواړي، چې د افغانستان د امنیت پر موضوع خبرې وکړي.
د اروپایي ټولنې د بهرنۍ او امنیتي تګلارې مشر جوزېف بورېل ویلي، دوی دې ته ګوري، چې څنګه کېدای شي د بهرنیو ځواکونو پرته د افغان حکومت ملاتړ وکړي، چې په وینا یې دا هغه څه دي، چې دی به د اوونۍ په پای کې له ولسمشر غني سره پرې خبرې وکړي.
